د مستوفیتونو او ولایتي ګمرکونو کارکوونکو لپاره د «مالي چارو او کار وړ مدیریت» تر سرلیک لاندې روزنیز پروګرام جوړ شو
د وږې ۲۵مه ۱۴۰۵ هـ.ش
د مالیې وزارت د کارکوونکو چارو ریاست د مستوفیتونو او ولایتي ګمرکونو(۵۰) تنو کارکوونکو لپاره د «مالي چارو او کار وړ مدیریت» تر سرلیک لاندې روزنیز پروګرام د یو لړ مراسمو په ترڅ کې د عوایدو او ګمرکونو ملي اکاډمۍ په تالار کې جوړ کړ.
په دې مراسمو کې د مستوفیتونو د همغږۍ او انسجام رئیس مفتي عبدالغفار سلیم، د مالي او حسابي ریاست د محاسبې آمر حافظ آقا محمد ابونصیب، د کارکوونکو چارو ریاست د روزنې او ظرفیت لوړونې آمر مفتي عبدالوهاب عابد او یو شمېر نورو مسئولینو ګډون کړی وو.
د روزنې او وړتیا لوړونې آمر د دغه پروګرام د پرانیستې په مراسمو کې وویل، له هغو امکاناتو او فرصتونو څخه چې تاسو ته برابر شوي دي، اعظمي ګټه واخلئ او د مسلکي مهارتونو په ترلاسه کولو سره په عملي، صادقانه او مخلصانه توګه خدمت وکړئ. سربېره پر دې، د مسئولینو سپارښتنې په مستقیم ډول واورئ او د کار په ساحه کې یې عملي کړئ.
د مستوفیتونو د همغږۍ او انسجام رئیس وویل، هڅه وکړئ، له هغو زده کړو څخه چې دلته مو ترلاسه کړې دي، شته ستونزې حل کړئ او د بیتالمال ساتنه وکړئ. د اسلامي امارت د استازو په توګه هڅه وکړئ، چې د نظام په اړه د خلکو په ذهنونو کې ښه انځور پرېږدئ.
د مالي او حسابي ریاست د محاسبې آمر وویل، هغه دنده او بست چې تاسو یې ترلاسه کړئ، ستاسو په وړاندې امانت دی؛ هڅه وکړئ چې د دغه امانت حق په ښه توګه ادا کړئ. د امانت حق هغه مهال په سمه توګه ادا کېدای شي، چې په سپارل شویو دندو کې غفلت ونه کړئ.
