د ګمرکونو لوی رئیس د یو شمېر ټرانزیټي شرکتونو له استازو سره وکتل
د ګمرکونو لوی رئیس مفتي عبدالمتین سعید د یو شمېر ټرانزیټي شرکتونو له استازو سره د ګمرکونو او عوایدو معینیت د غونډو په تالار کي وکتل.
په دې کتنه کي، چي د ګمرکونو لوی ریاست تخنیکي او عملیاتي مرستیالانو او یو شمېر رئیسانو هم ګډون کړی وو، په پیل کي د ټرانزیټي شرکتونو استازو له ګاونډیو هیوادونو په ځانګړي ډول له پاکستان هیواد سره او د ګمرکونو په ګډون د اړوندو داخلي ادارو له لوري د شته ستونزو یادونه وکړه او د ګمرکونو له لوی رئیس څخه ئې د حل غوښتنه وکړه.
دوی وویل، چي که په یادو برخو کي ئې ستونزي حل کړای سي د افغانستان له خاوري به د بهرني ټرانزیټ کچه نوره هم زیاته سي.
د ګمرکونو لوی رئیس د دوی د ستونزو له اورېدو وروسته وویل، چي زموږ هڅه داده څو له ټولو ممکنه لارو په ګټي اخیستنې سره د افغانستان له لاري د بهرني ټرانزیټ کچه لوړه کړو، له یوې خوا به دولت ته عواید راسي او له بلې خوا به هیوادوالو ته د کار زمینه برابره سي.
نوموړي د یادو شرکتونو استازو ته ډاډ ورکړ، چي له ګاونډیو هیوادونو په ځانګړي ډول له پاکستان هیواد سره به د حل په موخه شته ستونزي په رسمي ډول شریکي سي او له اړوندو داخلي ادارو او د ګمرک په برخه کي به هم ستاسو ستونزو ته ژر رسېدنه وسي.
