د ۱۴۰۱ مالي کال د ملي بودیجې د تصویب په تړاو مطبوعاتي کنفرانس
د ۱۴۰۱ مالي کال ملي بودیجې د تصویب او دولتي تشکیل د وروستي کولو په موخه مطبوعاتي کنفرانس د مالیې وزارت په خیبرهال کي ترسره سو.
په دغه کنفرانس کي د افغانستان اسلامي امارت د ریاست الوزراء اداري مرستیال مولوي عبدالسلام حنفي، د مالیې وزیر الحاج ملا هدایت الله بدري، د ښارجوړونې وزیر مولوي حمدالله نعماني، د مخابراتو او معلوماتي ټکنالوژۍ وزیر نجیب الله حقاني، د چارو ادارې رئیس مولوي بلال، د عوایدو او ګمرکونو معین الحاج ملا محمد ناصر اخند، د افغانستان بانک استازي او یو شمېر کورنیو او بهرنیو رسنیو ګډون کړی وو.
د کنفرانس په پيل کې د رئیس الوزراء اداري مرستیال مولوي عبدالسلام حنفي ګډونوالو ته د ښه راغلاست ترڅنګ وویل: زموږ نننی کنفرانس د ۱۴۰۱ هـ ل مالي کال د ملي بودیجې د تصویب په اړه دئ، ملي بودیجه د حکومتونو د پالیسي د عملي کولو یوه وسیله ده. د نظام له بدلون او اسلامي امارت له حاکمیت وروسته، شرایطو ته په کتو د مالي کال مهالوېش بدلون سره د درې میاشتو (جدي، دلو، حوت) بودیجه د بهرنیو مرستو پرته د کورنیو عوایدو پر بنسټ تصویب او په سمه توګه پلې سوه او د ټولو دولتي کارکوونکو معاشونه اجرا سول. وروسته بیا د کورنیو سرچینو پر بنسټ د ۱۴۰۱ل مالي کال پر ملي بودیجه باندي کار ترسره سو، چي د دغي بودیجې وړاندوینه (۲۳۱،۴) میلیارډه افغانۍ سوې ده، چي له دې شمیر څخه (۲۰۳،۴) میلیارډه افغانۍ یې عادي بودیجه او (۲۷،۹) میلیارډه افغانۍ یې انکشافي بودیجه ده، چي په بشپړه توګه له کورنیو عوایدو څخه ترتیب سوې او هیڅ ډول بهرنی مالي ملاتړ نه لري.
نوموړي همدا رنګه وویل: چي د ۱۴۰۱ ل مالي کال بودیجې هدف (۱۸۶) میلیارډه افغانیو څخه پورته ټاکل سوی وو او د بودیجې کسر (۴۴) میلیارډه افغانۍ اټکل سوی دئ. تمه سته چي یاده اندازه به د کورنیو عوایدو د کچې لوړیدو پر اساس تمویل سي او همدارنګه د هیواد پر مالي سرچینو وضعه سویو محدودیتونو ته په کتو انکشافي بودیجه کي یواځي هغه پروژې په نظر کي نیول سوي دي، چي عواید یې د نورو پروژو په پرتله زیات دي او له اقتصادي اړخه د خلکو پر ژوند مستقیم اغیز لري، چي د رېل پتلۍ او قوش ټیپې کانال پروژې یې مهمې بېلګي دي.
نوموړي څرګنده کړه، چي د معاشونو د برابروالي او سپما په موخه د معاشونو د تنظیم کمېسیون ایجاد سوی او د ټولو دولتي کارکونکو پر معاشونو بیا کتنه سوې ده، چي په پایله کي د لوړ پوړو کارکونکو معاشونه را کم سوي او د ټیټ رتبه کارکونکو په معاشونو کي کوم بدلون ندی راغلی. یاد کمېسیون همدارنګه د وظیفوي تراکم او موازي تشکیلاتو د مخنیوي په موخه د ټولو دولتي ادارو پر تشکیل بیا کتنه کړې او هڅه یې کړې ده، چي د بې کاري مخنیوي وکړي. په ټول هیواد کي د روغتیا او زده کړو په برخه کي د ښو خدمتونو د وړاندې کولو په موخه د یادو ادارو په تشکیل کي د پام وړ زیاتوالی راغلی، چي د پوهني وزارت د ۱۴۰۱ ل کال تشکیل ۱۸۹ زره بستونو ته رسېدلی دئ.
نوموړي همدا رنګه زیاته کړه، چي دې ته په پام سره، چي ټول پخواني کارکوونکي په ادارو کي په خپلو دندو مشغول دي، هڅه سوې ده، چي د ظرفیتونو ساتني په موخه بالمقطع کارکونکي په ادارو کي مدغم سي. د غیر ضروري لګښتونو او تجملي اجناسو له پیرلو څخه ډډه وسي.
