د دفاع وزارت د سرمفتشیت کارکوونکو لپاره دایر شوی روزنیز پروګرام پای ته ورسېد
د زمري۱۳مه ۱۴۰۵ هـ.ل
د مالیې وزارت د کورنۍ پلټنې لوی ریاست له لوري د دفاع وزارت د سرمفتشیت کارکوونکو لپاره د پلټنې په تړاو یو میاشتنی تخصصي روزنیز پروګرام په بریالیتوب پای ته ورسېد.
په همدې مناسبت د دفاع وزارت له لوري جوړه شوې غونډه د مالیې وزارت د کورنۍ پلټنې لوی ریاست کفیل ښاغلي انجنیر محمد شفیق حکمت، د خزاینو او میزانیې پلټنې رئيس ښاغلي مولوي احمدالله حقاني او همداراز د دفاع وزارت سرمفتش ښاغلي مولوي لطیف الله حکیمي، د یادې ادارې معاونینو، رئیسانو او علماوو په حضور کې ترسره شوه.
د غونډې په ترڅ کې د مالیې وزارت د کورنۍ پلټنې لوی ریاست د خزاینو او میزانیې پلټنې رئيس، د دوامداره زده کړو، له دغو پروګرامونو څخه د غوره ګټي اخیستنې او د پلټونکو د دیني او دنیاوي مسؤلیتونو په اړه خبرې وکړې. ورپسې د دفاع وزارت سرمفتش د ظرفیت لوړونې په برخه کې د مالیې وزارت له همکارۍ څخه مننه وکړه او د پلټنې، روڼتیا، حساب ورکونې او د پلټونکو د مسلکي مسؤلیتونو د اهمیت ترڅنګ یې د دا ډول پروګرامونو په دوامداره جوړېدو ټینګار وکړ.
د غونډې په پای کې د کورنۍ پلټنې لوی ریاست له لوري د یاد روزنیز پروګرام ګډونوالو ته تصدیق لیکونه او د دفاع وزارت سرمفتشیت له لوري د مالیې وزارت روزونکو ته ستاینلکونه ورکړل شول.
