د عوایدو لوی رئیس د کورنیو او نړیوالو مؤسسو له مسئولینو او استازو سره ناسته وکړه
د غبرګولي۳۱مه ۱۴۰۵هـ.ل
د مالیې وزارت د عوایدو لوی رئیس الحاج مولوي سفر محمد سحر په مشرۍ او د عوایدو عملیاتي مرستیال، د حقوقي خدمتونو او پالیسۍ ریاست استازو او د لسګونو داخلي او نړیوالو مؤسسو د مسئولینو په ګډون د عوایدو او ګمرکونو معینیت د غونډو په تالار کې د کورنیو او نړیوالو مؤسسو د مالیاتي ستونزو د حل په موخه ناسته وشوه.
په پیل کې د عوایدو لوی رئیس د داخلي او نړیوالو مؤسسو له مسئولینو او استازو سره ناسته د مالیاتي تصفیې په برخه کې د ستونزو د حل لپاره ګټوره وبلله او زیاته یې کړه، چې دغه ډول ناستې د مالیې په اړه له نویو بدلونونو، پالیسیو او په مالیاتي بهیر کې د رامنځته شویو اسانتیاوو څخه د خبرېدو په موخه ګټورې دي؛ څو د راتلونکو مالیاتي تصفیو ستونزي حل کړي.
وروسته د عوایدو د حقوقي خدمتونو او پالیسۍ ریاست استازي د ناستې ګډونوالو ته د غیر انتفاعي مؤسسو لپاره د مالیاتي معافیت د صادرولو په پروسه کې د رامنځته سویو سهولتونو په اړه معلومات وړاندې کړل، چې ورپسې بیا د عوایدو عملیاتي مرستیال هم د مالیاتو په برخه کې د مؤسسو د هر ډول ستونزو د حل په موخه لازمې لارښوونې او سپارښتني وکړې، چې د مؤسسو له لوري د عملي کولو په صورت کې به د هغوی مالیاتي ستونزي حل، مالیاتي معافیت به پر وخت ترلاسه او د مالیې د تصفیې کارونه به یې په چټکۍ سره ترسره شي.
په دې مشورتي ناسته کې د کورنیو او بهرنیو مؤسسو استازو خپلې غوښتنې، ستونزې، د مالیاتي تصفیې او د مالیاتي معافیت ترلاسه کولو پر وړاندې د شته خنډونو د حل وړاندیزونه هم له مسئولینو سره شریک کړل.
د یادونې وړ ده، چې د عوایدو لوی ریاست د مالیاتي ستونزو د حل او د لازمو اسانتیاوو د رامنځته کولو په موخه له بېلابېلو مؤسسو سره ناستې ترسره کوي.
