د هیواد یو شمېر ګمرکونو ته د څه باندي (۶)لکه امریکایي ډالرو په ارزښت بېلابېل وسایط وپېرل سول
د مرغومي ۱۶مه ۱۴۰۴هـ.ل
د مالیې وزارت د ګمرکونو لوی ریاست د حیرتان، آقینې او فراه ګمرکونو کي د چارو د لا چټکتیا، سوداګرو او موټر چلوونکو ته د اسانتیا رامنځته کولو او د ګمرکي کارکوونکو ستونزو ته د رسېدو په موخه د (۶)لکه او (۲۵۰۰) امریکایي ډالرو په ارزښت درې عرادې لوډر، درې عرادې ډمپر او دوه عرادې د اوبو ټانکرونه وپېرل.
له دې وړاندي په یادو ګمرکونو کي د شدیدو ریګي بادونو له امله ډېری وخت د ګمرک احاطه او سړکونه له بندښت او ستونزو سره مخ کېدل، چي د دغه وسایطو له پېرلو او کاروني سره به یادي ستونزي حل او په اړونده برخه کي به اسانتیاوي رامنځته سي.
د یادوني وړ ده، چي د افغانستان اسلامي امارت له بیاځلي واکمنۍ څخه راوروسته د هیواد په ګمرکونو کي بېلابېلي ودانیزي او تجهیزاتي پروژې پلي سوي دي او ځینې ئې د پلي کېدو په حال کي دي.
