د ۱۴۰۵ کال د ملي بودیجې د ترتیبولو د لارښوود ورکشاپ ترسره سو!
د لېندۍ ۲۰مه ۱۴۰۴ هـ.ل
مالیې وزارت د امارتی ادارو او وزارتونو د بودیجوي واحدونو له پاره د (۱۴۰۴ هـ.ل) کال د ملي بودیجې د چمتو کولو لارښوود تر سرلیک لاندي (۲) ورځنی ورکشاپ ترسره کړ.
په دې غونډه کي چي د دې وزارت خیبرهال د کنفرانسونو په تالار کي جوړه سوې وه، اداري معین مولوي دوست محمد مخلص، د ملي بودیجې لوی رئیس استاد عبدالجبار وحدت، د ملي بودیجې لوی ریاست د پلان او ریفورم رئیس پوهندوی غلام عمر عبدالله او د وزارتونو او امارتي ادارو د بودیجوي واحدونو استازو ګډون کړی وو.
د مالیې وزارت اداري معین د ورکشاپ د پرانیستلو پرمهال وویل، څرنګه چې ملي بودیجه له کورنیو عوایدو څخه تمویلېږي، نو لازمه ده، چي بودیجوي واحدونه د هیواد د مالي او اقتصادي وضعیت په پام کې نیولو سره ملي، عایداتي او د کارزیاتوني پروژې وړاندي کړي؛ ترڅو د غیر ضروري لګښتونو مخه ونیول سي.
د ملي بودیجې لوی ریاست د پلان او ریفورم رئیس په خپلو خبرو کي وویل، چي د مالیې وزارت د هر مالي کال په پای کي د اغېزمني بودیجې چمتو کولو په موخه لارښود ترتیبوي او هر کال اړتیاوو ته په کتو سره په دغه لارښوود کي بدلونونه راځي، چي په دې برخه کي د بودیجې واحدونو د همکارۍ غوښتونکي یو.
نوموړي؛ د یوه پریزنیټېشن وړاندي کولو پرمهال د هیواد د اوسني مالي او اقتصادي وضعیت، د ملي بودیجې د ترتیب څرنګوالي، د ملي بودیجې د ترتیب د موخې، د عادي او پراختیایي بودیجې اړتیاوو، د پروژو لومړیتوبونو، له فتحي څخه مخکي د نیمګړو پروژو د تخصیص او نورو مهمو او اړوندو مسایلو په تړاو معلومات وړاندي او د ګډونوالو پوښتنو ته ئې ځوابونه وویل.
د یادوني وړ ده، چي د مالیې وزارت هر کال د ملي بودیجې د ښه مدیریت او پلي کولو په موخه د بودیجوي واحدونو له پاره د لارښووني ورکشاپونه جوړوي.
