د تورغنډۍ په سرحدي ګمرک کي ګمرکي مسئولینو څلور تنه غله نیولي!
د غویي ۶مه ۱۴۰۴ هـ.ل
د مالیې وزارت د ساتني او ځانګړو عملیاتو تنفیذي قطعې ځیرکو کارکوونکو د هرات ولایت تورغنډۍ په سرحدي ګمرک کي د سخي داد، چي په بډوک مشهور وو، عصمت الله، سلام او عبیدالله په نومونو څلور تنه غله ونیول.
دغه غله داسي مهال نیول کېږي، چي غوښتل ئې د موټرونو په تمځای کي د لویو بار وړونکو موټرونو له ټانکیو څخه تېل او نور تجاري توکي ولوټي، چي د یادي قطعې د مسئولینو له لوري لاس په لاس ونیول سول. نیول سوي کسان د نورو څېړنو په موخه اړوندو ارګانونو ته سپارل سوي دي.
د یادوني وړ ده، چي له دې وړاندي هم د ساتني او ځانګړو عملیاتو تنفیذي قطعې ځیرکو کارکوونکو د هرات ولایت په سرحدي ګمرک کي څلور تنه غله نیولي وو.
