په ګمرکونو کي د سوداګریزو توکو د شفافو پړاوونو تر سره کولو په تړاو د مالیې وزارت خبرتیا!
په دې وروستیو کي ځیني سوداګریز شرکتونه د خپل ورکړل سوي جواز پر ځای د کمېشنکار پر جواز په ګمرکونو کي د خپلو سوداګریزو توکو ګمرکي پړاوونه ترسره کوي.
د مالیې وزارت د ګمرکونو لوی ریاست له ټولو سوداګریزو شرکتونو څخه غوښتنه کوي، چي خپل سوداګریز توکي په خپل جواز ګمرک ته وارد او ګمرکي پړاوونه ئې د خپل رسمي استازي له لوري تر سره کړي.
د ټولو سوداګریزو مالونو د پړاوونو تر سره کول چي په هر جواز وي، دا چي ټول حمایوي اسناد ئې د واردونکي شرکت په نوم دي؛ نو د قانون له مخي د هماغه شرکت په نوم پېژندل کېږي او هر ډول مسؤلیت ئې هم په همدې شرکت پوري اړه لري.
همدا شان د ګمرکونو لوی ریاست له ټولو هغو سوداګریزو شرکتونو څخه، چي تر اوسه ئې خپل استازي د ګمرکونو لوی ریاست ته نه دي معرفي کړي غوښتنه کوي، تر څو د روژې مبارکي میاشتي تر پایه د خپلو سوداګریزو مالونو د ګمرکي پړاوونو لپاره خپل استازي په رسمي ډول د ګمرکونو لوی ریاست ته معرفي کړي. همدا شان له دې وروسته که چیري د شرکتونو رسمي استازي له ګمرکي اصولو څخه سرغړونه کوي، ټول مسؤلیت به ئې د معرفي سوي شرکت پر غاړه وي او د ګمرکونو لوی ریاست ته به هم شرکت ځواب ویونکی وي.
د یادوني وړ ده، چي د ګمرکونو لوی ریاست د رهبرۍ د پریکړي له مخي هر شخص په ګمرکونو کي له درېیو څخه د زیاتو شرکتونو استازیتوب نسي کولای.
