د ډنډپټان په ګمرک کي د شاوخوا (۴۴) میلیونه افغانیو په ارزښت د رغنیزو پروژو چاري پیل سوې
د ګمرکونو لوی ریاست سوداګرو ته د اسانتیا رامنځته کولو او د دوی ستونزو ته د رسېدو په موخه د پکتیا ولایت د ډنډپټان په ګمرک کي د (۴۳.۷) میلیونه افغانیو په ارزښت د رغنیزو پروژو پرانېسته وکړه.
په یادو پروژو کي د ډنډپټان په ګمرک کي د دوه بابه هنګرونو جوړېدل، د ګمرک د اړوندي ساحې هموار کاري، د یاد ګمرک د احاطې او استنادي دیوالونو جوړېدل شامل دي، چي چاري ئې د ګمرکونو لوی ریاست د حمایت او پراختیا رئیس ښاغلي محمد موسی عمر په مشرۍ له مرکز څخه د تللي پلاوي، د پکتیا ولایت امنيه قوماندان مولوي محمد عمر مخلص، د ولایت مقام استازي قاضي ثواب جان اسلام يار، د اطلاعات او کلتور رئيس، د دندپټان ولسوال او امنیه قوماندان او د ډنډپټان کمیسار له لوري په رسمي ډول پیل سوې.
د یادوني وړ ده، چي د یادو پروژو بودیجه د مالیې وزارت له پراختیایي بودیجې څخه تمویلېږي او چاري به ئې د یوه کال په موده کي بشپړي سي، چي له دې سره به سوداګرو ته د اسانتیاوو رامنځته کېدو تر څنګ د یاد ګمرک چاري لا چټکي او کارکوونکو ته به ئې هم اسانتیاوي رامنځته سي.
