د پلټني، کاري پروسو، سیسټمونو او اړونده قوانینو په تړاو روزنیز پروګرام پیل سو!
د دوامداره پرمختګ او مسلکي پراختیا په موخه، د مالیې وزارت کورنۍ پلټني لوی ریاست د دې ادارې کارکوونکو ته د پلټني، کاري پروسو، سیسټمونو او اړونده قوانینو په تړاو یو میاشتنی روزنیز پروګرام د مالیې وزارت په خیبر هال کي پیل کړ.
د پروګرام په پیل کي د کورنۍ پلټني لوی رئیس انجنیر عبداللطیف خالد د پروګرام ګډونوالو ته د ښه راغلاست ترڅنګ، د روزنیزو پروګرامونو د ارزښت او ګټو په اړه خبري وکړې او د مسلکي ظرفیت لوړوني لپاره ئې دا ډول پروګرامونه خورا مهم وبلل.
ښاغلي خالد له کارکوونکو څخه په ټینګه وغوښتل، چي په پوره لېوالتیا د ظرفیت لوړوني په پروګرامونو کي ګډون وکړي، خپلي نیمګړتیاوي رفع او مسلکي وړتیاوي لا پیاوړي کړي.
ورپسې د کورنۍ پلټني لوی ریاست اړوند د شتمنیو پلټني او بودیجوي واحدونو د ظرفیت لوړوني رئیس قاضي شېرزمان بلوچ د یاد روزنیز پروګرام د محتویاتو او درسي پلان په اړه جزئیات وړاندي کړل او له ګډون کوونکو څخه ئې وغوښتل، چي په دغه رونیز پروګرام کي فعاله ونډه واخلي ترڅو ئې اغېزمنتیا لا ډېره ګټوره تمامه سي.
