د ا.ا.ا د چارو ادارې لوی ریاست، اداري اصلاحاتو او ملکي خدمتونو ادارې د پالیسیو ریاست او مالیې وزارت په همغږۍ؛ د کارکونکو د کړنو او اجراآتو د ارزوني درې ورځنی ورکشاپ پیل سو.
د پروګرام په پرانیستنه کي د مالیې وزارت کفیل ملا محمد ناصر اخند، د چارو ادارې د ملکي خدمتونو حقوقو او پالیسیو چارو رئیس سید مسعود مخلص، د ملکي خدمتونو او اداري اصلاحاتو د حقوقو او پالیسیو مرستیال الحاج ویس الدین ویس، د مالیې وزارت د بشري سرچینو رئیس مولوي احمد شاه شاکر او د اړوندو ادارو یو شمېر رئیسانو او کارکونکو ګډون کړی وو.
د مالیې وزارت کفیل ملا محمد ناصر اخند وویل: چي دغه شان روزنیز ورکشاپونه ډېر مهم دي او ښه به و، چي له وړاندي په لاره اچول سوي وای. ده زیاته کړه، چي دغه روزنیز ورکشاپ یواځي د ملکي خدمتونو کارکونکو لپاره نه؛ بلکي د ټولو دولتي ادارو او خلکو لپاره ګټور تمامېږي.
ښاغلي سید مسعود مخلص، د دغه روزنیز ورکشاپ په پرانیست غونډه کي د یادي ادارې د تشکیل او لاسته راوړنو تر څنګ وویل: چي دغه روزنیز ورکشاپ د ملکي خدمتونو کارکونکو د ظرفیت لوړولو، د اجراآتو د ګټورتوب، او د یوې مسلکي او ځواب ویونکي ادارې رامنځته کولو په موخه په لاره اچول سوي دی.
ښاغلي ویس الدین ویس وویل: چي د دې ورکشاپ اساسي موخه خلکو ته د ښو خدمتونو وړاندي کول دي او د ملکي خدمتونو اداره د کارکونکو د ظرفیت لوړولو په موخه له ټولو ادارو سره د هر ډول همکاریو لپاره چمتوالی لري.
