د ۱۲ مستوفیتونو له مالي او حسابي کارکوونکو څخه د روزنیز پروگرام لومړۍ دورې له بشپړاوي وروسته ازموینه واخیستل سوه!
د مالیې وزارت د خزاینو لوی ریاست د بشري سرچینو ریاست په همکارۍ د ننگرهار، نورستان، لغمان، کونړ، کابل، کاپیسا، پروان او کابل مستوفیتونو د کارکوونکو د کاري ظرفیت لوړولو په موخه روزنیز پروگرام جوړ کړی وو، چي د دغه پروگرام له بشپړېدو وروسته له یادو کارکوونکو څخه ازموینه واخیستل سوه.
دغه ازموینه د گمرکونو او عوایدو په ملي اکاډمۍ کي د خزاینو لوی ریاست د مسؤلینو په حضور کي واخیستل سوه. هغه کسان، چي له دې پروگرام څخه ئې په اغېزمنه توگه گټه پورته کړه او ازموینه ئې په بریالتوب ترسره کړه، خپلو دندو ته به دوام ورکړي او د هغو کسانو پر ځای به نوي کسان وگومارل سي، چي په ازموینه کي بریالي سوي نه وي.
د یادولو وړ ده، چي د مالیې وزارت د خزاینو لوی ریاست د روزنیز پروگرام دوهمه دوره به ډېر ژر د یو شمېر نورو ولایتي مستوفیتونو د کارکوونکو له پاره هم پیل سي.
