په ګمرکونو کي د روان کال د مرغومي میاشتي د کړنو تخنیکي ارزونه وسوه
د روان کال مرغومي میاشت کي د ګمرکونو د وضعیت ارزوني په موخه تخنیکي ناسته د ګمرکونو لوی رئیس ښاغلي مفتي عبدالمتین سعید په مشرۍ، د یاد ریاست د غونډو په تالار کي د ویډیو کنفرانس له لارې ترسره سوه.
په دې ناسته کي چي د ګمرکونو لوی ریاست رئیسانو او اړوندو مسؤلینو ګډون درلود، په پیل کي د ګمرکونو لوی رئیس ګډونوالو ته د ښه راغلاست تر څنګ د ملي عوایدو د راټولېدو او سوداګرو ته د اسانتیاوو د رامنځته کولو په برخو کي د ولایتي ګمرکونو د مسؤلینو صادقانه هڅي وستایلي.
نوموړي وویل، چي د هیواد په ټولو ګمرکونو کي د تعرفي او قیمت ګذارۍ برخي اجراات باید یو شان و اوسي او د ولایتي ګمرکونو مسؤلینو ته ئي سپارښتنه وکړه، چي د ګمرک د مسؤل او معاونینو ترمنځ همغږۍ لا زیاته سي.
ورپسې د ګمرکونو لوی ریاست د پلان جوړوني، پالیسۍ، څارني او ارزوني رئیس ښاغلي محمد وسیم عثمان له لوري په ګمرکونو کي د روان کال مرغومي میاشتي د تر سره سویو فعالیتونو په تړاو ټولیز راپور وړاندي سو او همدا راز په یاده موده کي د روان کال د لېندۍ میاشتي په پرتله د عوایدو راټولېدو، د هیواد په ټولو ګمرکونو کي تر سره سوې سوداګرۍ، د وارداتي توکو ګمرکي ارزښت او د سوداګریزو محمولو د شمېر او ثبت سوي وزن په اړه ناستي ته بشپړ معلومات وړاندي کړل او ګډونوالو خپلي ستونزي او وړاندیزونه له یوه بل سره شریک کړل.
