مالیې وزارت د رهبرۍ پلاوي لسمه ناسته ترسره سوه
د مالیې وزارت سرپرست الحاج ملا هدایت الله بدري، په مشرۍ د دې وزارت د رهبرۍ پلاوي لسمه ناسته د یاد وزارت په مقام کي ترسره سوه.
په دې ناسته کي چې د قرآن عظیم الشان د مبارکو ایاتونو په تلاوت سره پیل سوه، د دعوت او ارشاد ریاست استازي په ګډون د مالیې وزارت ګڼ شمېر رئیسانو او مسؤلینو ګډون کړی وو، په پیل کي د یاد وزارت مشرتابه ته د تېري ناستي پایلي، پرمختګونه، خنډونه او په ګمرکونو کي د باقیاتو د راټولولو او تصفیې د مؤظف سوي تخنیکي کمېټې مفصل راپور وړاندي سو.
د ناستي په پرانیستې وینا کي د دعوت او ارشاد ریاست استازي، په اسلامي نظام کي د دندو پر ارزښت او په صحیح توګه د نه ترسره کولو پر جزاء او دنوي او اخروي ناوړه پایلو خبري وکړې او له ټولو کارکوونکو څخه یې وغوښتل چي خپلو دندو ته په صداقت او ایماندارۍ حاضر او ترسره کړي.
ورپسې د مالیې وزارت د ګمرکونو او عوایدو معین الحاج ملا محمد ناصر اخند، چي د رواني اوونۍ په سر کي یې د ګمرکاتو د عمومي رئیس سره یو ځای د خوست، پکتیا او پکتیکا ولایتونو ته سفر کړی وو، په سرحدي ګمرکونو کي د مځکي او تعمیرونو د ستونزو، په سرحدي سیمو کي د دولتي او خصوصي بانکونو نه شتون او په همدې سیمو کي عامو خلکو ته د درملو او خوړو د ستونزو په تړاو بشپړ او هر اړخیز راپور ګډونوالو ته وړاندي کړ.
د مالیې وزارت سرپرست الحاج ملا هدایت الله بدري، د تېري ناستي د پایلو او کاري پرمختګونو د راپور د اورېدو په تړاو د ناستي له ګډونوالو څخه مننه وکړه او لارښوونه یې ورته وکړه، چي د نن مجلس په اوږدو کي څرګند سوي موضوعات دي په کلکه تعقیب سي او اړوند کسان دې د یادو ستونزو په تړاو ګام پورته کړي، ترڅو د سرحدي سیمو او په ټوله کي د خلکو او کارکوونکو ستونزي پر وخت سره حل سي.
همدا شان د ناستې په پای کي پرېکړه وسوه، چي د رهبرۍ پلاوي لسمې ناستي د پایلو او پرمختګونو په تړاو راپور دي راتلونکي ناستي ته وړاندي سي.
