د ۱۳۹۹ مالي کال د سیمه ایز اتصال عالي شورای لومړۍ ناسته وشوه
د مالیې وزارت سرپرست او د زېربناء په چارو کې د ولسمشرۍ عالي مقا ستر سلاکار ښاغلي پروفیسور محمد همایون قیومي، په مشرۍ د ۱۳۹۹ مالي کال سیمه ایز اتصال عالي شورای لومړۍ ناسته په مالیې وزارت کې وشوه.
په دې ناسته کې د افغانستان د اوسپنې کرښې لپاره د اوسپنې واحد ګېچ په تثبیت، پلاني پروژو، پنځو هیوادونو تر منځ (افغانستان، چین قرغیزستان، تاجیکستان او ایران) د اوسپنې په کرښې ، د اوسپنې کرښې په ځانګړنو، له متفاوتو ګېچونو په را زېږېدلو ستونزو، د افغانستان له خاورې سویلي اسیا ته د مرکزي اسیا او روسیې فدراتیف اوسپنې کرښې په نښلونې، د دې پروژې د پلي کولو لپاره په وړاندیز او ستونزو او یو شمېر نورو اړوندو مسایلو په تړاو خبرې او د نظرونو تبادله وشوه.
په دې ناسته کې د سیمه ایز اتصال عالي شورای د ټرانسپورټ وزارت ته دنده وسپارله، چې د شورای د غړو د وړانديز په پام کې نیولو سره د اوسپنې په یوه کرښه کار وکړي څو د هیواد اقتاصدي ګټې تر ډېره بریده زیاتې او له سویلي اسیا سره د منځنۍ اسیا هیوادونو د نښلېدو سبب شي.
