د ګمرکونو لوی رئيس کندهار ولایت ته د خپل رسمي سفر په لړ کي د کندهار له والي سره وکتل
د ګمرکونو لوی رئیس ښاغلي مفتي عبدالمتین سعید، چي د یوه پلاوي په مشرۍ د کندهار ګمرک د چارو ارزونې په موخه دغه ولایت ته په رسمي سفر تللی، تېره ورځ ئې د کندهار له والي ښاغلي محمد یوسف (وفا) سره هم ولیدل.
په دې لیدنه کي چي د کندهار ګمرک رئیس هم شتون درلود، د کندهار والي ورغلي پلاوي ته د ښه راغلاست ترڅنګ په خپل وخت سره د سوداګرو ستونزو ته د رسېدنې او غوره ګمرکي فعالیتونو په برخه کي د کندهار ګمرک د کارکوونکو یادونه او ستاینه وکړه.
همداشان دواړو لوریو د یاد ولایت د ګمرک په عصري کولو، د سوداګرو ستونزو ته د رسیدنې او دوی ته د لا اسانتیاوو په رامنځته کولو بحث او د نظرونو تبادله وکړه.
