د کینو، مالټو او زیړو سلفرو ترانزیټي گمرکي تضمین له ۱۱۰٪ څخه ۶۰٪ ته راکښته سو
د سوداگرو په غوښتنه، د گمرکونو لوی ریاست د رهبرۍ په وړاندیز او د مالیې وزارت مقام په منظورۍ د کینو، مالټو او زیړو سلفرو ترانزیټي گمرکي تظمین له ۱۱۰ سلني څخه ۶۰ سلني ته راکښته سو.
دا چې اوس مهال یاد درې ترانزیټي توکي د افغانستان له لاري د بهرني ترانزیټ ډیره برخه جوړوي، نو د گمرکونو لوی ریاست پرېکړه وکړه، چي سوداگرو ته د اسانتیا برابرولو په موخه د یادو توکو ترانزیټي گمرکي تضمین کم کړي.
همداشان د گمرکونو لوی ریاست ټولو اړوندو گمرکونو ته هدایت ورکړې، چي په بهرني ترانزیټ کي یادو توکو ته لومړیتوب ورکړي.
د یادوني وړ ده که چیري په یادو درو ترانزیټي توکو کي کوم سوداگر د ترانزیټ له قانون څخه سرغړونه کوي؛ نو د ده توکي به د بهرني ترانزیټ له کړنلاري سره سم د گمرکي دین ۱۱۰ سلني باندي محصول کیږي.
