د کورنۍ پلټني لوی رئيس ننګرهار او لغمان ولایتونو ته سفر وکړ
د مالیې وزارت د کورنۍ پلټني لوی رئیس انجنیر عبداللطیف خالد، په مشرۍ یو پلاوي د چارو د هر اړخیزي ارزوني په موخه ننګرهار او لغمان ولایتونو ته سفر وکړ او د دغه ولایتونو له مستوفیتونو او همدارنګه د ننګرهار ولایت ګمرک ریاست او د دغه ولایت اړوند طورخم سرحدي ګمرک څخه یې لیدنه وکړه.
انجنیر عبداللطیف خالد د ننګرهار او لغمان ولایتونو له مستوفيانو، د ننګرهار ګمرک رئیس او طورخم ګمرک له مدیر، کارکوونکو او هري شعبې څخه په جلا توګه لیدنه وکړه، د پلټونکو له لوري د وروستیو پلټنو په ترڅ کي د ورکړل سوو سپارښتنو د تطبیق پوښتنه یې وکړه او ټینګار یې وکړ، چي د چارو د ښه والي او رونټیا رامنځته کولو په موخه باید د پلټني سپارښتني په ټاکلي موده کي پلي او راپور یې له مرکز سره شریک سي. ښاغلي خالد د کارکوونکو پر مسلکیتوب او تخصص تاکید وکړ او هیله یې څرګنده کړه چي هر یو کارکوونکی ورسپارل سوې دنده په ښه توګه ترسره او د مالیې وزارت د اهدافو په لاسته راوړلو کي اغیزمن رول ادا کړي.
ورپسې د کورنۍ پلټني لوی رئیس د یادو ادارو د کارکوونکو ستونزي او غوښتني واورېدې او په اړه یې ورسره لازمي مشورې شریکي کړې. همدارنګه ښاغلي خالد ژمنه وکړه، چي د دغو ادارو هغه ستونزي، چي د مالیې وزارت مشرتابه یې باید په اړه پرېکړه وکړي، د وزارت له مقام سره په نږدې راتلونکي کي شریکي کړي.
د یادوني وړه ده، چي تر دې مخکي هم د کورنۍ پلټني لوی رئیس او ورسره ملا پلاوي فراه، نیمروز، هرات، بادغیس، کونړ او نورستان ولایتونو ته په همدې موخه سفر کړی وو، هلته يې له والیانو، مستوفيانو، رئیسانو او کارکوونکو سره لیدلي وو.
