د وزارتونو او دولتی ادارو د عایداتي برخي مسؤلینو ترمنځ ناسته ترسره سوه
د وزارتونو او دولتی ادارو د عایداتی برخې مسولینو ترمنځ دغه ناسته د عوایدو عمومي رئیس، معراج محمد معراج په مشرۍ، د غیرمالیاتي عوایدو رئیس، امان الله امین او د بېلابېلو وزارتونو او دولتي ادارو د عایداتي برخې مسولینو په ګډون د ګمرکونو او عوایدو عمومي ریاست د غونډو په تالار کې ترسره سوه.
دغې ناستې کې د اړوندو مسولینو له لوري د ګزارشونو او وړاندیزونو له وړاندې کولو وروسته، په وزارتونو او دولتي ادارو کې د غیرمالیاتی عوایدو د کسر د بشپړاوي پر څرنګوالي بحث او خبرې اترې وسوې او د شته ستونزو د هواري لپاره مناسبې حللارې وړاندې سوې، همدارنګه ټاکلو موخو ته د رسېدو لپاره اړوندو برخو ته لازم هدایات وسول.
د عوایدو عمومي رئیس، معراج محمد معراج د راټولو شویو غیرمالیاتي عوایدو د زیاتوالي په موخه د ځینو اړوندو ادارو هڅې وستایلې او د هغو ادارو لپاره چې د غیرمالیاتي عوایدو په راټولو کې د ۱۴۰۱ کال غبرګولي ۳یمه نیټې پورې له ټاکلې موخې څخه وروسته پاتې دي، حل لاره وړاندې کړه او یادو برخو کې له مسولینو د لا همکارۍ غوښتونکی سو.د غیر مالیاتي عوایدو رئیس، امان الله امین ګډونوالو ته د لازمو لارښونو ترڅنګ، ټینګار وکړ، چې موږ باید له خپلو کورنیو عوایدو ملي بودیجه تمویل کړو.
د یادونې وړ ده، د هرو دوو میاشتو په ورستیو کې، خپلو موخو ته د رسېدو او د ښکیلو اړخونو د کړنو ارزونې لپاره د مالیې وزارت، عوایدو عمومي ریاست کې ناستې ترسره کېږي.
