د ملي بودیجې د ترتیب او اجراء په تړاو روزنیز ورکشاپ جوړ سو
د ملي بودیجې لوی ریاست د داخلي کارکوونکو د ظرفیت لوړولو په موخه د ملي بودیجې د ترتیب او اجراء په تړاو (۲۰ ورځنی) روزنیز ورکشاپ د ملي بودیجې د پلان او ریفورم رئیس پوهنمل غلام عمرعبدالله او د ملي بودیجې اجرائیوي رئیس عبدالجبار وحدت په ګډون د ملي بودیجې لوی ریاست د غونډو په تالار کي جوړ سو.
د ملي بودیجې د پلان او ریفورم رئیس محترم پوهنمل غلام عمرعبدالله د یاد ورکشاپ په پرانیستې وینا کي وویل، چي د ملي بودیجې لوی ریاست د کار ماهیت او پایښت تخصصي او تخنیکي دئ، له همدې امله اړتیا لیدل کېږي، چي د کارکوونکو لپاره په هیواد دننه او بهر د ظرفیت لوړوني پروګرامونه برابر سي.
هغه همدا راز زیاته کړه، په کومه ټولنه کي، چي پوهه له یوه فرد څخه بل ته ونه لېږدول سي هغه ټولنه د پرمختګ او ښېرازۍ پر لور نه ځي؛ نو د یوې ښېرازه او پرمختللي ټولني درلودلو له پاره باید د ظرفیت لوړوني همدغه ډول پروګرامونه جوړ سي.
ورپسې د ملي بودیجې اجرائیوي رئیس محترم عبدالجبار وحدت د ظرفیت لوړوني پروګرامونو پر اړتیا او اهمیت، د مالي چارو او بودیجې د ادارې د موخو په اړه خبري وکړې او وئې ویل؛ څرنګه چي د ملي بودیجې لوی ریاست یو تخصصي او تخنیکي ریاست دئ؛ نو له دې فرصتونو څخه باید پوره ګټه واخیستل سي او په نږدې راتلونکي کي هم باید د ملي بودیجې لوی ریاست د تخنیکي ټیم له لوري د بودیجوي واحدونو له پاره ورته پروګرامونه ترتیب سي.
په پای کي بیا د ملي بودیجې د پلان او ریفورم ریاست تخنیکي ټیم د غونډي ګډونوالو ته خپل پریزنټېشن وړاندي کړ او په بېلابېلو برخو کي ئې د کارکوونکو پوښتني ځواب کړې.
