د مالیې وزارت مالي مرستیال د څو اړخیزه پانګونې تضمین په برخه کې د نړیوال بانک له معاون سره ولیدل
د مالیې وزارت مالي مرستیال عبدالحبیب ځدراڼ، د نړیوال بانک او پیسو نړیوال صندوق پسرلنیو ناستو په حاشیه کې د څو اړخیزه پانګونې تضمین (MIGA) په برخه کې د نړیوال بانک له معاون هیروشي متانو، او مل ټیم سره د ویډیو کنفرانس له لارې خبرې او لیدنه وکړه.
د مالیې وزارت مالي مرستیال په دې لیدنه کې د انرژۍ، مخابراتو او معلوماتي ټکنالوژۍ، ټرانسپورټ، کانونو، کرنې او غذایي موادو د پروسس په برخه کې د خصوصي سکټور پانګونې د فرصتونو په تړاو خبرې وکړې.
په مقابل کې یې هیروشي متانو، له خپل لوري په افغانستان کې د بهرنیو پانګوالو د هڅونې او د تخنیکي مرستو له لارې د خصوصي سکټور د پانګونې او خصوصي سکټور ته د تضمین برابرولو په برخه کې ډاډ ورکړ.
