د مالیې وزارت د مرکزي ریاستونو۵۰ تنو نویو ګومارل سوو کارکوونکو ته روزنیز پروګرام جوړ سو!
د مالیې وزارت د بشري سرچینو ریاست د یو لړ مراسمو په ترڅ کي د یاد وزارت په خیبرهال کي د مرکزي ریاستونو (۵۰) تنو نویو ګومارل سوو کارکوونکو ته روزنیز پروګرام جوړ کړ.
مولوي احمدشاه شاکر د دغه پروګرام په پرانیستې وینا کي وویل، چي تاسو ته د نظام حالت معلوم دئ او تاسو د دې نظام د واکمنېدو د څرنګوالي شاهدان یاست. دا اسلامي نظام استحکام، پیاوړتیا او پرمختګ ته اړتيا لري، پر همدې بنسټ د ماليې وزارت رهبرۍ د انساني قوې او اقتصادي بنسټونو د پياوړتيا په موخه د بېلابېلو روزنیزو پروګرامونو لړۍ، چي د نن ورځي پروګرام يو له هغو څخه دئ.
نوموړي، له ګډونوالو څخه وغوښتل، چي له دې پروګرام څخه په استفادې سره له مدیریتي مهارتونو سره ځان اشنا کړئ او خپله مسلکي پوهه پراخه کړئ؛ ترڅو خپل مسؤلیتونه په سمه توګه ترسره او د فساد مخه ونیسئ. هغه زیاته کړه، فساد یوازي رشوت اخیستل او اختلاس نه دئ، بلکي کمکاري او د خلکو په کارونو کي د خنډ راوستل هم فساد بلل کېږي؛ نو که خپل مسؤلیت په سمه توګه ترسره نه کړئ، فساد به مو کړی وي.
مراسم د خیر دعا په لوستلو پای ته ورسېدل او روزنیز پروګرام رسماً پیل سو.
د یادوني ده، چي دغه پروګرام به (۱) اوونۍ دوام وکړي او مدیریتي موضوعات به پکښې تدریس سي.
