د مالیې وزارت او عامې روغتیا وزارت ترمنځ د مالي اصلاحاتو پلي کولو ګډ هوکړه لاسلیک

د مالیې وزارت مالي مرستیال ښاغلي عبدالحبیب ځدراڼ او د عامې روغتیا وزارت د پلان او پالیسۍ مرستیال ښاغلي محمد بشیر نورمل، ترمنځ د کب میاشتې په ۱۲ مه نېټه د مالي اصلاحاتو پلي کولو او غوره کړنو په موخه ګډ هوکړه لیک دواړو ادارو د یو شمېر کارکوونکو په حضور کې لاسلیک شو.

دغه پروګرام د اصلاحاتو، مالي جوړښتونو او عامه لګښتونو د مدیریت په چارو کې یو بریالی پروګرام ګڼل کېږي. د مالي اصلاحاتو او کړنلارو ښه کولو پروګرام به د ملي او بین المللي کارپوهانو له خوا له تحلیل او ارزونې وروسته د عامې روغتیا په وزارت کې نور هم وغځېږي، چې د دې وزارت د عامه مالي مدیریت او عملکر سیستم د کمزورۍ او قوت ټکي د عامه لګښتونو او مالي حساب ورکړي (PEFA) د چوکاټ پر بنسټ و ارزول شي او د مالي خطرونو پېژندنه یې وشي.

د افغانستان حکومت په لټه کې دی، چې د عامه مالي سرچینو د مدیریت په موخه د مالي اصلاحاتو پروګرام نورو وزارتونو ته هم وغځوي، چې په لومړي ګام کې کېدای شي دغه پروګرام د یوې ځانګړې مېتولوژۍ له مخې په هغو وزارتونو او بنسټونو کې متمرکز شي، چې د پام وړ تخصیص شوې بودیجه او د عوایدو راټولېدو وړتیا ولري. په دې سربېره هغه ډله بنسټونه چې د پام وړ خدمتونو وړاندي کولو مسؤلیت پرغاړه لري هم په دې پروګرام کې شاملېږي.

دا مهال دغه پروګرام د مالیې، کانونوـ پطرولیم او پوهنې وزارتونو، د ملي تدارکاتو او د پلټنې عالي ادارې له لوري پلي کیږي، چې یاد بنسټونه د دغو پروګرامونو د پلي کولو لګښت د افغانستان د عملکرد معلوماتي سیستم مدیریت APMIS له لارې په انلاین توګه مدیریت کوي. د افغانستان د عملکرد معلوماتي سیستم د سیمې په کچه یو پرمختللی سیستم دی چې د افغان کارپوهانو او تخنیکي کارکونکو په نوښت په نړیوالو معیارونو برابر جوړ شوی.

دغه سیستم د پالیسیو د عملي کېدو او د الکترونکي حکومتولۍ د رامنځ ته کېدو او د حساب ورکولو په اړه د شویو ژمنو د عملي کېدو په موخه رامنځ ته شوی دی.