د مالیې او عامې روغتیا وزیرانو پر دوه اړخیزه همکارۍ ټینګار وکړ
د مالیې وزارت سرپرست الحاج ملا هدایت الله بدري او د عامي روغتیا وزیر ډاکټر قلندر عباد، د دواړو ادارو ترمنځ د غوره همغږۍ رامنځته کولو او دوه اړخیزه همکاریو پر ټینګښت لیدنه او تفصیلي خبرې وکړې.
په دې لیدنه کي چي د دواړو ادارو یو شمېر مسؤلینو هم ګډون کړی وو، دواړو لورو د دوه اړخیزه همکارۍ په رامنځته کولو، د ابن سینا فارمسي شرکت د چارو د لا ښه تنظیم، د عامي روغتیا وزارت د نیمه کاره پاتي پروژو پر بشپړېدو، د نا بشپړو سوو پروژو پر مالي ستونزو او یو شمېر نورو اړینو موضوعاتو خبري وکړې.
د عامي روغتیا وزیر ډاکټر قلندر عباد، د مالیې وزارت له سرپرست سره په خبرو کي وویل: موږ په تخنیکي او تخصصي برخه کي بشپړ مجرب پرسونل لرو، خو یوازي د پروژو د بشپړولو او ځینو برخو د تنظیم لپاره مالي ملاتړ ته اړتیا لرو، چي په دې تړاو د مالیې وزارت د همکارۍ غوښتونکي یوو.
د د مالیې وزارت سرپرست الحاج ملا هدایت الله بدري، نوموړي ته په مالي برخه کې د ډاډ ورکولو ترڅنګ وویل: د مالیې وزارت د روغتیا برخي ته ځانګړې پاملرنه لري، ترڅو د روغتیا سکټور د تل لپاره پر خپلو پښو ودرېږي او د مالیې وزارت به د خپلو مالي امکاناتو په پام کي نیولو سره هر راز مرسته کوي او د روغتیا سکټور ته به په مشترک ډول د مالي امکاناتو اسانه لاره او چاره لټوي.
