د مالیاتي شخړو د حل بورډ د روان کال په درېیمه ربعه کي (۲۶) قضیو ته رسېدنه کړې ده
د مرغومي ۳۰مه ۱۴۰۴هـ.ل
د مالیې وزارت د مالیاتي شخړو د حل بورډ، چي د مالیاتي شخړو د حل او مالیاتي عدالت رامنځته کولو، د مالیاتي اطاعت پذیرۍ کچي لوړولو، د مالیاتي قوانینو له ښه پلي کېدو څخه د ډاډ ترلاسه کولو، د مالیه ورکوونکو او مالیاتي ادارو ترمنځ د باور رامنځته کولو او په خصوصي سيکټور کي د پانګوني د هڅوني او ملاتړ په برخو کي فعالیت کوي. دغه بورډ د (۱۴۰۴) هـ.ل کال په درېیمه ربعه کي ئې څه باندي (۲۶) قضیوته رسېدنه کړې ده.
معترضو مالیه ورکوونکو د یادو قضیو له دقیقي څېړني او رسېدني څخه بشپړ قناعت ښودلی او رابرسېره سوي مالیات ئې له حکم سره سم بیت المال ته تحویل کړي دي.
د مالیاتي شخړو مسلکي او تخنیکي حل له یوې خوا د عوایدو له تېښتي څخه مخنیوی او پر ملي بودیجې مثبته اغېزه کوي او له بلي خوا د مالیه ورکوونکو او مالیاتي ادارو ترمنځ باور رامنځته کوي، چي له دې لاري د خصوصي سيکټور د رضایت سبب هم ګرځي.
د یادوني وړ ده، چي که چيرته کوم مالیه ورکوونکي د مالیاتي ادارو پر مالیاتي پرېکړو قناعت ونه لري، کولای سي د (۴۵) ورځو په موده کي د مالیه ورکوونکو د شکایتونو اورېدو ریاست ته خپل اعتراض وړاندي کړي. که بیا هم د یاد ریاست پرېکړه د دوی د قناعت وړ و نه ګرځي؛ نو په دوهم قدم کي دي د (۳۰) ورځو په موده کي خپل اعتراض د مالیاتي شخړو د حل بورډ ته د بیاکتني په موخه وړاندي کړي، چي د یاد بورډ له لوري به پر وخت رسېدنه ورته وسي.
