د افغانستان د گمرکونو په تاريخ کي تر ټولو لوړ گمرکي عوايد
د افغانستان د گمرکونو په تاريخ کي په لومړي ځل د روان (۱۴۰۱ ) مالي کال په لومړيو ( ۱۱ ) مياشتو کي د هيواد له گمرکونو څخه (۱۰۰) ميليارده افغانۍ عوايد راټول سوي دئ. دا په داسي حال کي ده، چي د اسلامي امارت له حاکميت وړاندي هيڅکله هم د هيواد د گمرکونو کلني عوايد له (۷۲) ميليارده افغانيو څخه لوړ سوي نه وه.
ددې سره سره چي د افغانستان اسلامي امارت د رهبرۍ له لوري پر لومړنيو خوراکي توکو گمرکي محصول تر
( ۶۸ ) سلني پوري کم سوی؛ خو بيا هم د مالي کال د پای ته رسېدو څخه يوه مياشت وړاندي گمرکي عوايد (۱۰۰) ميليارده افغانيو ته رسېدلی دئ.
د گمرکونو په عوايدو کي دغه بې ساری لوړوالی د دې ښودنه کوي، چي په گمرکونو کي مسلکي او ژمن کادرونه گمارل سوي، فساد صفر سوی او په چارو کي پوره روڼتيا رامنځته سوې ده.
اوس مهال د هيواد ټول گمرکونه د سوداگريزو مالونو د چټک طی مراحلو په موخه (۲۴ ) او (۱۶) ساعته فعاليت کوي او تر څنگ ئې ټول هغه خنډونه، چي د سوداگرو پر وړاندي ئې ستونزې پيداکولې او يا ئې د فساد زمينه برابروله، له منځه تللي دي.
ماليې وزارت په خاصه توگه د گمرکونو عمومي رياست د هيواد د گمرکونو عصري کولو او په ټولو گمرکونو کي سوداگرو ته د لازمو اسانتياوو رامنځته کولو ته ژمن دئ؛ تر څو ملي گمرکي عوايد لا زيات سي او په پوره روڼتيا سره د دولت خزانې ته وسپارل سي.
