د افغانستان د سولې او پراختیا ملي چوکاټ (ANPDF-2) دویم سند په تړاو مشورتي او تخنیکي ناسته وشوه

د مالیې وزارت پالیسۍ مرستیالې اغلې ناهید سرابي په مشرۍ د افغانستان د سولې او پراختیا ملي چوکاټ (ANPDF-2) دویم سند په تړاو مشورتي او تخنیکي ناسته د کانونو او پطرولیم، ټرانسپورټ، ښارجوړنې او ځمکو، کرنې اوبولګونې او مالدارۍ، لوړو زده کړو او پوهنې وزارتونو د مرستیالانو او د اوبو د تنظیم ملي ادارې او برېښنا شرکت رئیسانو په ګډون د غويي میاشتې په ۲۴ مه نېټه په مالیه وزارت کې ترسره شوه.
په دې ناسته کې د افغانستان د سولې او پراختیا ملي چوکاټ دویم سند په تړاو تفصیلي خبرې او د نظرونو تبادله وشوه.

دا چې د افغانستان د سولې او پراختیا ملي چوکاټ پلي کېدونکی معیاد د ۲۰۲۱ کال تر پایه پوري پای ته رسېږي، ټاکل شوې ده د افغانستان د سولې او پراختیا ملي چوکاټ (ANPDF-2) دویم سند، چې د پنځو راتلونکو کلونو لپاره د افغانستان اسلامي جمهوري دولت لومړیتوبونه د ۲۰۲۰ کال نوامبر په میاشت کې د کنفرانس له لارې چې په فنلنډ کې ترسره کېږي، د افغانستان پراختیایي شریکانو ته وړاندي شي.