د مالیې وزارت او د رحمت ۱۰۱ بستریز روغتون ترمنځ د همکاریو هوکړه لاسلیک شو

د وږې ۲مه ۱۴۰۵هـ.ل

د مالیې وزارت د کارکوونکو چارو رئیس عبیدالله ابو احمد او د رحمت (۱۰۱) بستریز روغتون د مالي مسئول عبدالاحمد غزنوي له لوري، د اداري تخنیکي همکاریو ټینګولو، روغتیایي خدمتونو ته د کارکوونکو د ښه لاسرسي او د درماني او حمایتي پروګرامونو اجراءکولو د همغږۍ په موخه د مالیې وزارت او دغه روغتون ترمنځ د همکاریو هوکړه لیک لاسلیک شو.
د دغه هوکړه لیک پر بنسټ به د رحمت (۱۰۱) بستریز خصوصي روغتون د مالیې وزارت کارکوونکو او کورنیو ته یې په بېړنۍ، زړه، جراحۍ، اورتوپیدي او اعصابو، عمومي داخله او ماشومانو، ستونې او غوږونو، لپراسکوپي، ِام آر آی، سیټي سکن او ایکسرې برخو کې د مسلکي معیارونو مطابق تر (۳۰) سلنې تخفیف پورې روغتیایي خدمتونه وړاندې کوي.
د مالیې وزارت پر شرایطو برابر کارکوونکي به دغه روغتون ته ور معرفې او له خدمتونو څخه به یې برخمن کېږي.
د یادونې وړده، چې د دې هوکړه لیک په لاسلیک کولو سره به د مالیې وزارت کارکوونکو او کورنیو ته یې معیاري روغتیایي، بېړني او چټک خدمتونه وړاندې او د بېماریو له کبله د غیابت او بهرنیو هیوادونو ته د ناروغانو د درملنې لپاره د وړلو مخنیوی کوي.