مالیې وزارت د مسلکي محاسبې مسلک نور هم معیاري کوي
د افغانستان د مسلکي محاسبینو اداره، د مالیې وزارت د خزاینو لوی ریاست تر چتر لاندي کار کوي. د دې ادارې بنسټ په (۲۰۱۳) زېږدیز کال کي په افغانستان کي د معیاري محاسبې او په مالي راپور ورکولو کي د روڼتیا رامنځته کولو په موخه رامنځته سو. دغه اداره په افغانستان کي د مسلکي محاسبې یوازینۍ تنظیموونکې اداره ده، چي په مالي راپور ورکولو کي د کیفیت او تضمین راوستلو، د ناوړه کړنو څېړنه او په مقابل کي د څارونکو اقداماتو ترسره کولو، په افغانستان کي د محاسبې نړیوالو مسلکي معیارونو عملي کولو، د مسلکي محاسبې لارښوونو او روزنو، د مالیاتي تېښتي د مخنیوي، د مسلکي محاسبینو او پلټونکو شرکتونو د ثبت او د فعالیت جواز ورکولو او د دوی د کار او کیفیت د څارني په برخه کي فعالیت کوي.
د افغانستان د مسلکي محاسبینو اداره ژمنه ده، چي په مالي راپور ورکولو کي رونټیا رامنځته کړي. د دې له پاره ئې په هیواد کي د لومړي ځل لپاره د پلټونکو ادارو او د مسلکي زده کړو بنسټونو ته د جواز ورکولو پروسه پیل کړه. د مالي چارو د پلټني ادارې، په امارتي او خصوصي شرکتونو کي د پلټني چاري ترسره کوي، چي موخه ئې د مالیاتو له تېښتي څخه مخنیوی، د مالي ستونزو رابرسېره کول او حلول، د مالي روڼتیا رامنځته کول او د مالي چارو معیاري کول دي.
له کلونو راهیسي افغانستان د مسلکي محاسبینو له کموالي سره مخ وو او په دې برخه کي د مسلکي محاسبینو نه شتون، د افغانستان مالي ادارې له ګڼو ستونزو سره مخ کړي وې. د همدې ستونزو د حل او د مسلکي محاسبې د پیاوړتیا په موخه د مالیې وزارت د خزاینو لوی ریاست د افغانستان د مسلکي محاسبینو ادارې افغان زده کوونکو ته د (ACCA) وړیا بورسونه وړاندي کړل، چي د دې بورسونو مالي لګښت به هم د مالیې وزارت له لوري د یادي ادارې له ترتیب سوي کړنلاري سره سم ورکول کېږي او تر دې دمه په سلګونو زده کوونکي له دې پروسې څخه برخمن سوي دي.
د افغانستان د مسلکي محاسبینو اداره به په افغانستان کي د پلټونکو شرکتونو او د مسلکي زده کړو ښوونیزو مرکزونو د یوې څارونکي ادارې په توګه خپل فعالیت ترسره کوي او د پلټونکو شرکتونو، ښوونیزو مرکزونو او انفرادي محاسبینو له کړنلارو او شفافیت څخه به نظام ته ډاډ ورکوي.
په افغانستان کي د محاسبې مسلک د شفافیت او حساب ورکوني له پاره اساس دئ، چي له دې سره به د مالي منابعو ښه مدیریت او د فساد مخنیوی وسي. د دې مسلک په پرمختګ سره به مالي روڼتیا رامنځته سي، چي دا به په پانګونه او سالم اقتصادي چاپیریال رامنځته کولو کي هم مرسته وکړي. په افغانستان کي د محاسبې مسلک لاهم پیاوړتیا ته اړتیا لري. د محاسبې مسلکي ښوونه او روزنه باید له نړیوالو معیارونو سره همغږې سي؛ ترڅو د دې مسلک ارزښت او کچه نوره هم زیاته سي.
درنښت
Announcements More
MoF Approves Decisions of Second Meeting of Tariff Committee of Current Fiscal Year
Second meeting of the Tariff Committee that had been convened on the 20th of September (29th Sanbula),
NOTIC For Iron Traders!
According to the order of the Prime Ministership of IEA, the export of any kind of iron equipment and tools is prohibited.