د ۱۲ مستوفیتونو د مالي او حسابي کارکوونکو له پاره د روزنیز پروګرام لومړۍ دوره پیل سوه!
د مالیې وزارت د خزاینو لوی ریاست له لوري او د بشري سرچینو ریاست په همکارۍ د ننګرهار، نورستان، لغمان، کونړ، کابل، کاپیسا، پروان، لوګر، میدان وردګ، پکتیا، خوست او پکتیکا مستوفیتونو مالي او حسابي کارکوونکو له پاره د روزنیز پروګرام لومړۍ دوره پیل سوه.
دغه روزنیز پروګرام د یو لړ مراسمو په ترڅ کي د مالیې وزارت د ګمرکونو او عوایدو ملي اکاډمۍ د کنفرانسونو په تالار کي پرانیستل سو، چي اداري معین مولوي دوست محمد مخلص، د افغانستان د مالي مدیریت معلوماتي سیسټم (افمیس) رئیس او د خراینو لوی ریاست سرپرست انجینر ستارالدین معتصم، د بشري سرچینو رئیس مولوي احمد شاه شاکر، د محاسباتو رئیس محب الله صاحبزاده او د مستوفیتونو مالي او حسابي برخي کارکوونکو ګډون پکښي کړی وو.
د مالیې وزارت اداري معین مولوي دوست محمد مخلص په خپلو خبرو کي وویل، چي دغه روزنیز پروګرام د نظام د پیاوړتیا او خلکو ته د غوره خدمتونو د وړاندي کولو په موخه جوړ سوی او تاسو، چي د دغه اسلامي نظام د خادمانو په توګه دلته راټول سوي یاست؛ د دې پروګرام څخه د پوهي او پوهاوي د پراختیا او د اړوند مسؤلیت په ښه توګه ادا کولو، د حلالو او حرامو توپیر، د حق د ضایع کېدو د مخنیوي او خلکو ته د غوره خدمتونو وړاندي کولو په موخه جوړ سوی دئ.
د افغانستان د مالي ادارې د معلوماتي سیسټم رئیس انجنیر ستارالدین معتصم ووېل، په مرکز او ولايتونو کي د هغه پروګرامونه، چي په انلاين او حضوري بڼه جوړ سول، خورا ګټور تمام سول. دا پروګرام هم د مهارتونو د لا ښې ودي په موخه جوړ سوی او له هغه شته امکاناتو او فرصتونو څخه په استفادې، ستاسي لپاره برابر سوی، چي خپل مهارتونه لا پراخ او د شفافیت په تأمین، د بیت المال په ساتنه او د فساد په مخنیوي کي برخه واخلئ.
د بشري سرچینو رئیس مولوي احمدشاه شاکر هم په خپلو خبرو کي وویل، چي د مالیې وزارت د خپل توان او امکاناتو له مخي ستاسو د ظرفیت لوړولو په موخه دا ډول پروګرامونه برابروي، له همدې امله وطن او نظام ته د ژمن مجاهد په توګه خپل مسؤلیت په اصولي او شرعي ډول ادا کړئ.
د محاسباتو رئيس محب الله صاحبزاده وويل، چي د خزاینو لوی ریاست د هیواد په کچه او مستوفیتونه په ولایتونو کي د مالیې وزارت د استازولیو په توګه د مالي چارو مسؤلیت په غاړه لري. هڅه وکړئ، چي د دې پروګرام له پاره له ځانګړي سوو امکاناتو، اسانتیاوو او تجربه لرونکو روزونکو څخه اعظمي ګټه پورته کړئ او خپل مسؤلیتونه په اصولي او قانوني ډول ترسره کړئ.
په پای کي دغه مراسم د خیر په دعايې پاي ته ورسېدل.
د یادوني وړ ده، چي دغه دوره به (۲) اوونۍ دوام وکړي، چي په هغې کي به د مالي چارو او عامه لګښتونو قانون، د ملي بودیجې پلي کولو اصولنامه، د کرایې مقرره، سفریه او جیب خرڅ، د تدارکاتو قانون او طرزالعمل، د معاشونو او لګښتونو د حوالو ترتیب، پیشکي تادیات او چک ليست، د معاشونو بانکي کول، ولایتونو ته د شتمنیو لېږد، د ادارو بانکي حسابونو ته د پیشکي حوالو د لګښت او لېږد څرنګوالی، فورمې، نغدي او جنسي کنټرول، د حسابونو جدول، د ولایتي لګښتونو تطبیقات، بانکي تطبیقات، د عادي او پراختیايي بودیجې د تخصیصاتو طی مراحل او اړوند نور موضوعات تدریس سي.
