د چنګاښ په میاشت کې د تر سره شویو ګمرکي چارو تخنیکي ارزونه وشوه
د زمري۲۱مه۱۴۰۵هـ.ل
د مالیې وزارت د ګمرکونو او عوایدو معین الحاج ملا نعمت الله حسن په مشرۍ او د ګمرکونو لوی رئیس الحاج مولوي محمد حامد احمد او اړوندو مسئولینو په ګډون د روان (۱۴۰۵) هـ.ل کال د چنګاښ په میاشت کې په ګمرکونو کې د ترسره شويو چارو د تخنیکي ارزونې ناسته پر لیکه او حضوري بڼه وشوه.
په پیل کې د ګمرکونو او عوایدو معین د ګمرکونو مسئولینو ته د ښه خدمت کولو، پر خپل وخت سره د خلکو ستونزو ته د رسېدو او یو شمېر نورو موضوعاتو په اړه لازمې سپارښتنې وکړې. نوموړي مسئولینو ته د اړوندو چارو په ترسره کولو کې د پوره ملاتړ ډاډ ورکړ او د ګمرکونو د مسئولینو ترمنځ پر لا ښې همغږۍ او همکارۍ رامنځته کولو یې ټینګار وکړ.
ور پسې په (۱۴۰۵)هـ.ل کال د چنګاښ په میاشت کې په ګمرکونو کې د ترسره شویو فعالیتونو په تړاو ټولیز راپور وړاندې شو او همداراز په دې موده کې د عوایدو راټولېدو، د هیواد په ټولو ګمرکونو کې ترسره شوې سوداګرۍ، د وارداتي توکو ګمرکي ارزښت او د سوداګریزو محمولو د شمېر او ثبت شوي وزن په اړه غونډې ته بشپړ معلومات ورکړل شول.
همدارنګه د چارو د لا پرمختګ په موخه د ولایتي ګمرکونو د مسئولینو ستونزې او وړاندیزونه واورېدل شول، چې د رهبرۍ له لوري د ستونزو د حل ډاډ ورکړل شو.
