د ګمرکونو او عوایدو معینیت د اړوندو ریاستونو ترمنځ د همغږۍ په ناسته کي پر مهمو موضوعاتو خبري وسوې!
د وږي ۱۷مه ۱۴۰۴هـ.ل
د مالیې وزارت د ګمرکونو او عوایدو معین الحاج مفتي عبدالمتین سعید په مشرۍ، د ګمرکونو او عوایدو معینیت د اړوندو ریاستونو ترمنځ د (۱۴۰۴) کال د همغږۍ شپږمه ناسته د دغه معینیت د غونډو په تالار کي وسوه.
په دې ناسته کي، چي د اړوندو ریاستونو مسئولینو ګډون کړی وو، په پیل کي د ګمرکونو او عوایدو معین خبري وکړې او وئې ویل، چي د مسئولینو د صادقانه هڅو په پایله کي ملي عواید ورځ تر بلي د ښه کېدو په حال کي دي او په چارو کي لازمه همغږي رامنځته سوې ده. همداشان نوموړي په ځینو برخو کي مسئولینو ته لازمي سپارښتني هم وکړې.
ورپسې د کارګو شرکتونو د بررسۍ او مالیاتو د ورکړي پر څرنګوالي، صنعتي فابریکو ته د دوه سلني انتفاعي مالیې د ورکړي او په ځینو ادارو کي د غیر مالیاتي عوایدو د سیسټمي کولو په اړه د ټاکل سویو پلاوو راپورونه وړاندي سول، چي په اړه ئې تر هر اړخیز بحث وروسته لازمي پرېکړي وسوې.
همدارنګه په دې ناسته کي د عالیقدر امیرالمؤمینین (حفظه الله تعالی) له حکم سره سم د جوازونو د ورکړي له پاره د ځانګړو تګلارو پر جوړېدو، په خپل وخت د کورنۍ پلټني د پلټنو د پایلو او سپارښتنو پر پلي کېدو او یو شمېر نورو موضوعاتو خبري او لازمي پرېکړي وسوې.
