د بهرنۍ پلټني شرکتونو او د مسلکي زده کړو ښوونیزو بنسټونو ته د فعالیت جوازونه ورکول سول!
د غبرګولي۱۲مه۱۴۰۴هـ.ل
د مالیې وزارت د خزاینو لوی ریاست اړوند د افغانستان د مسلکي محاسبینو اداره (CPA) چي د مسلکي محاسبینو د روزني، په دغه برخه کي د جواز ورکولو او د محاسبوي معیارونو د عملي کولو چاري ترسره کوي؛ د لومړي ځل له پاره ئې د بهرنۍ پلټني یو شمېر شرکتونو او د مسلکي زده کړو ښوونیزو بنسټونو ته د غړیتوب او فعالیت جوازونه ورکړل.
په همدې موخه جوړه سوې غونډه کي د مالیې وزارت د پالیسۍ معین انجنیر سلطان محمد زبیر، د کابل پوهنتون رئیس دوکتور اسامه عزیر، د مسلکي محاسبینو ادارې مسئولینو او د بهرنۍ پلټني شرکتونو او د مسلکي زده کړو ښوونیزو بنسټونو استازو ګډون کړی وو.
د مالیې وزارت د پالیسۍ معین وویل، چي د مسلکي محاسبینو ادارې سره ثبت د پلټني شرکتونو او د مسلکي زده کړو ښوونیز بنسټونه به د خلکو او حکومت ترمنځ د باور کچي په لوړلو کي مهم رول ولوبوي او د مالي چارو د بشپړي روڼتیا تضمین به وړاندي کړي.
د مسلکي محاسبینو د ادارې سرپرست د دې ادارې د فعالیتونو په تړاو معلومات ورکړل او زیاته ئې کړه، چي مسلکي محاسبینو ته د فعالیت جواز ورکولو موخه د هیواد په مالي چارو کي د بشپړي روڼتیا رامنځته کول، د فساد له منځه وړل او مسلکي محاسبې ته وده ورکول دي.
د غونډي په پای کي د بهرنۍ پلټني (۱۷) شرکتونو او د مسلکي زده کړو (۶) ښوونیزو بنسټونو ته د غړیتوب او فعالیت جوازونه ورکړل سول، چي دا به د رڼې مالي پلټني، مالي روڼتیا رامنځته کولو، د فساد او ملي عوایدو له تېښتي څخه د مخنیوي او د مسلکي محاسبې د منل سویو معیارونو د تطبیق په برخو کي مثبتي پایلي ولري.
