د مالیه ورکوونکو د شکایتونو اورېدلو ریاست ۳۶۵ شکایتونو ته رسېدنه کړې ده!
د مالیې وزارت د ګمرکونو او عوایدو معینیت اړوند د مالیه ورکوونکو د شکایتونو اورېدلو ریاست د تېر (۱۴۰۲هـ.ل) مالي کال په وروستیو دريو میاشتو کي (۳۶۵) شکایتونو ته رسېدنه کړې ده.
یاد ریاست ته د (۱۴۰۲هـ.ل) مالي کال په وروستیو دريو میاشتو کي سلګونو مالیه ورکوونکو (اصنافو او د شرکتونو مسؤلینو) د مالیې د ورکړي په بېلابېلو برخو کي خپل شکایتونه استولي ول، چي د یاد ریاست د شکایتونو د ارزوني تخنیکي کمېټې له لوري د ټولو شریک سوو شکایتونو له ډلي (۳۶۵) شکایتونو ته له دقیقي ارزوني وروسته، رسېدنه کړې او حل کړي ئې دي.
د مالیه ورکوونکو د شکایتونو اورېدلو ریاست د خپل مسلکي او تخنیکي ټیم په وسیله د مالیه ورکوونکو شکایتونو ته د رسېدني په موخه، سیمي ته ځي او هر مالیه ورکوونکی، چي له تثبیت سوي مالیې څخه خوښ نه وي شکایت ته ئې رسېدنه کوي او بشپړ رضایت ئې ترلاسه کوي.
