د ننګرهار ګمرک اړوند د کابل کمپ په ګمرک کي د (۵۱،۵) میلیونه افغانیو په ارزښت ودانیزي پروژې پیل سوې!
د مالیې وزارت د ګمرکونو او عوایدو معین ملا عبدالقاهر ادریس، چي د ګمرکونو لوی رئیس الحاج مفتي عبدالمتین سعید او د ګمرکونو لوی ریاست د حمایت او پراختیا رئیس محمد موسی عمر ئې ملتیا کوله ننګرهار ولایت ته رسمي سفر وکړ او هلته ئې د ننګرهار والي ملا محمد نعیم اخوند او د ننګرهار ګمرک رئیس محمد خالد منظور احمد په شتون کي د ننګرهار ګمرک اړوند د کابل کمپ په ګمرک کي د (۵۱،۵) میلیونه افغانیو په ارزښت د ودانیزو پروژو د پیلېدو پرانېسته وکړه.
په یادو ودانیزو پروژو کي د کابل کمپ ګمرک (۶۷۰۰) متره چاپېر دېوال او (۷) بابه ټاورونه شامل دي، چي چاري به ئې تر راتلونکو لسو میاشتو پوري بشپړي سي.
د ګمرکونو او عوایدو معین د یادو پروژو د پیلېدو په پرانيستغونډه کي وویل، چي په پام کي ده د هیواد په نورو ګمرکونو کي هم ورته پراختیایي پروژې پلي سي او په هیواد کي د سوداګرۍ د لا ودې او سوداګرو ته د لا اسانتیا رامنځته کولو په برخه کي به ښې پایلي ولري.
د ګمرکونو لوی رئیس له قراردادي شرکت څخه وغوښتل، چي د پروژې په پلي کېدو کي دي په جدي توګه د قرارداد مواد او شرایط په نظر کي ونیسي او چاري دي په معیاري توګه په ټاکلې موده کي بشپړي کړي.
د یادوني وړ ده، چي د یادو ودانیزو پروژو بودیجه د مالیې وزارت له پراختیایي بودیجې څخه ورکول کېږي.
