د ډنډ پټان په ګمرک کي د (۳۴) میلیونه افغانیو په ارزښت د هنګرونو د جوړېدو چاري رواني دي!
د مالیې وزارت د ګمرکونو لوی ریاست د پکتیا ولایت د ډنډ پټان په ګمرک کي د شاوخوا (۳۴) میلیونه افغانیو په ارزښت د دوو بابو هنګرونو د جوړېدو چاري پیل کړي دي، چي تر دې مهاله د یادي پروژې چاري (۹۰) سلنه پر مخ تللي دي او پاتي چاري به ئې هم ډېري ژر بشپړي سي.
د یادو هنګرونو د جوړولو لګښت د مالیې وزارت له پراختیایي بودیجې څخه د یوه افغاني شرکت له لوري پر مخ وړل کېږي، چي په جوړېدو سره به ئې د سوداګریزو توکو د خوندیتوب په برخه کي سوداګرو ته زیاتي اسانتیاوي برابري سي.
همداراز په یاد ګمرک کي د موټرونو د تمځای او احاطې دېوال د جوړېدو چاري هم په چټکۍ سره رواني دي.
د یادوني وړ ده، چي د مالیې وزارت له لوري د هیواد په ټولو ګمرکونو کي یو شمېر پراختیایي پروژې پلي سوي دي او ځینې ئې د پلي کېدو په حال کي دي.
