د مالیې وزارت د پالیسۍ معین د کوچنیو مالي تمویلاتو په ملي کنفرانس کي ګډون وکړ!
د مالیې وزارت د پالیسۍ معین انجنیر سلطان محمد زبیر د افغانستان بانک له لوري د وړو تمویلاتو ملي کنفرانس(فرصتونه او ننګوني) تر سرلیک لاندي، د پانګوني د هڅوني او د کاري فرصتونو د رامنځته کولو په تړاو جوړ سوي کنفرانس کي ګډون او وینا وکړه.
په دغه کنفرانس کي د اسلامي امارت د ریاست الوزراء اقتصادي مرستیال، د کابینې یو شمېر غړيو، د ملګرو ملتونو، اروپايي ټولني او نړیوال بانک استازو، د بېلابېلو هیوادونو سفیرانو، د نړیوالو او کورنیو مؤسسو مسئولینو او یو شمېر ملي پانګوالو او سوداګرو ګډون کړی وو.
د مالیې وزارت د پالیسۍ معین یاد کنفرانس ته د خبرو پر مهال وویل، چي د کوچنیو مالي تمویلاتو سکټور د يوه هيواد د اقتصادي ودي، بېکارۍ د له منځه وړلو، فقر سره د مبارزې او کوچنیو کاروبارونو د پراختيا په برخو کي مهم رول لري.
ښاغلي زبیر یادونه وکړه، چي د اسلامي امارت د بیا ځلي حاکمیت څخه راوروسته د کوچینیو تمویلونو سکټور چاري په مطلق ډول درېدلي وې، چي د مالیې وزارت له لوري د همدې سکټور د فعالیتونو د پیل په موخه هڅي پیل سوې او د شپږو میاشتو دوامداره هڅو په پایله کي د هیواد له ستري محکمې څخه په دې برخه کي د چارو د پیل جواز ترلاسه او په لومړي ځل شریعي مالي تمویلاتو مضاربت او مرابحې ته لاره هواره سوه.
د مالیې وزارت د پالیسۍ معین همداراز زیاته کړه، چي دغه وزارت تر مالکیت لاندي د (مسفا) ادارې تر اوسه پوري له (۶۰) زرو څخه ډېر مالي تمویلات، چي څه باندي (پنځه میليارډه) افغانۍ کېږي د مرابحې او مضاربت په شکل اجراء کړي دي او د تمویلاتو د اجراء چاري د (مسفا) ادارې له لوري د مالیې وزارت د بشپړ ملاتړ په درلودلو سره په نورمال ډول رواني دي.
د یادوني وړ ده، چي د کوچنیو مالي تمویلاتو ملي کنفرانس د دغه سکټور د ودي او پراختیا او د خصوصي او دولتي سکټورونو او ملي او نړیوالو ادارو ترمنځ د همغږۍ او همکارۍ رامنځته کولو په موخه جوړ سوی وو، ترڅو په دې وسیله په هیواد کي د فقر کچه را ټیټه او د دندو پیدا کېدو ته زمینه برابره سي.
