د روان مالي کال په دوهمه ربعه کي د هیواد ګمرکي چارو (۱۸) سلنه پرمختګ کړی دئ!
د روان (۱۴۰۳) هـ.ل کال په دوهمه ربعه کي په ګمرکونو کي د ترسره سويو چارو د تخنیکي ارزوني ناسته، د مالیې وزارت د ګمرکونو لوی رئیس الحاج مفتي عبدالمتین سعید په مشرۍ پر لیکه او حضوري بڼه جوړه سوه.
په دغه ناسته کي د روان (۱۴۰۳) هـ.ل کال په دوهمه ربعه کي په ګمرکونو کي د تر سره سويو فعالیتونو ټولیز راپور وړاندي سو؛ په یاده موده کي د عوایدو د راټولېدو، د هیواد په ګمرکونو کي د تر سره سوي سوداګرۍ، د وارداتي توکو د ګمرکي ارزښت او د سوداګریزو محمولو د شمېر او ثبت سوي وزن په اړه بشپړ معلومات وړاندي سول، چي له مخي ئې د تېر کال د همدې مودې په پرتله، د ګمرکونو چاري (۱۸) سلنه مثبتي وښودل سوې.
د وړاندي سوي راپور په تړاو هر اړخیز تخنیکي بحثونه وسول او د چارو د لا پرمختګ په موخه د ولایتي ګمرکونو د مسئولینو ستونزي او وړاندیزونه واورېدل سول، چي د ګمرکونو د رهبرۍ له لوري د ستونزو د حل ډاډ ورکړل سو او ور سره اړیني سپارښتني هم شریکي سوې.
په دغه ناسته کي همداراز، د روان کال د لومړیو شپږو میاشتو د سوداګرۍ هر اړخیز تحلیل وسو، چي له مخې ئې د تېر کال د همدې مودې په پرتله، هیواد ته د سوداګریزو توکو واردات (۳۲) سلنه زیات سوي دي
