د ۱۴۰۳ مالي کال عوایدي موخي ته د رسېدلو پر څرنګوالي بحث وسو!
د ماليې وزارت د عوایدو د لوی رئیس مولوي حافظ شاه حسین حسیني په مشرۍ جوړه سوې غونډه کي، چي د یاد ریاست مرستیالانو هم ګډون درلود؛ د عالیقدر امیر المؤمنین (حفظه الله) له لوري اصنافو ته د رامنځته سوي مالیاتي معافیت او تخفیف د ښه تطبیق او د (۱۴۰۳) مالي کال عوایدي هدف ته رسېدلو پر څرنګوالي بحثونه وسول.
د عوایدو لوی رئیس ښاغلي مولوي حافظ شاه حسین حسیني وویل، چي ټول کارکوونکي باید په خپلو کارونو کي د پوره اخلاص څخه کار واخلي او هر کله، چي په کارونو کي اخلاص وي؛ نو پرته له شکه پرمختګونه او لاسته راوړني به مو په برخه کېږي.
ښاغلي حسیني ټینګار وکړ، چي کارکوونکي باید د پوره اطاعت په فضا کي چاري مخته یوسي او خپلي ګټوري او نېکي مشورې له یو بل سره شریکي کړي؛ تر څو ګډ هدف، چي ولس او نظام ته خدمت کول دي، هغه په ښه ډول ترلاسه سي.
په دغه غونډه کي د اصنافو (کسبګرو او دوکاندارنو) د نوي مالیاتي معافیت او تخفیف په تړاو او همدارنګه د روان کال د عوایدي هدف د بشپړولو په موخه، له اړوندو مسؤلینوسره اړیني لارښووني او سپارښتني شریکي سوې.
