د مالیې وزارت سرپرست د کندهار ولایت ګمرک او مستوفیت د وضعیت ارزونې په موخه دې ولایت ته سفر وکړ.
د کندهار والي په بلنه د مالیې وزارت سرپرست محمد خالد پاینده، د یو پلاوي په مشرۍ د کندهار ولایت ګمرک او مستوفیت د وضعیت ارزونې په موخه دې ولایت ته سفر وکړ.
د مالیې وزارت له سرپرست سره؛ د کندهار ولایت د ګمرک او مستوفیت د کاري بهیر ارزونې او څارنې په اوږدو کې د کندهار والي روح الله خانزاده، د والي مرستیال فیصل شیرزي، په ولسي جرګه کې د خلکو استازو او ګڼو چارواکو ملتیا کوله. ښاغلي پاینده د کندهار ولایت د ګمرک او مستوفیت د کار کوونکو د ستونزو له اورېدو وروسته د شته ستونزو په هواري لازم هدایات ورکړ.
همدا شان د مالیې وزارت سرپرست؛ له ملي سوداګرو او د خصوصي سکټور له استازو سره دوی ته د اسانتیاوو برابرولو، د ډیجیټلي تلو د وضعیت ارزولو، ملي عوایدو، ګمرکي تعرفي یو شان کولو او یو شمېر نورو اړینو مسایلو په تړاو خبرې او د نظرونو تبادله وکړه. ښاغلي پاینده د ملي سوداګرو او خصوصي سکټور د استازو ستونزو له اورېدو وروسته ژمنه ورسره وکړه، چې د مالي امکاناتو او هیواد نافذه قوانینو په پام کې نیولو سره به وړاندي شویو ستونزو ته رسېدنه وکړي.
په دې سربېره د مالیې وزارت سرپرست؛ د باروړونکو موټرو له چلوونکو او ښار ته داخلېدونکو لارو لیدنه وکړه او د هغوی اړوند سندونه یې وکتل. د بار وړونکو موټرو په سندونو کې یو شمېر ستونزمن سندونه یې بېرته د ډاډ ترلاسه کولو په موخه د ګمرک ریاست ته واستول شول، څو د پلاوي په حضور کې یو ځل بیا کتنه پرې وشي.
د یادونې وړده، چې د مالیې وزارت سرپرست په ولایتونو کې د ګمرکونو او مستوفیتونو د وضعیت لیدلو په موخه سفرونه کوي، څو د ملي سوداګرو او خصوصي سکټور د استازو د ستونزو اورېدو ترڅنګ یې په حل لارو هم غور وکړو.
