په افغانستان کې د اسیا پراختیایي بانک د تمویلونکو پروژو لپاره د حفاظتي تدابیرو د اغیزمنتیا په موخه درې اړخیز هوکړه لیک لاسلیک شو
د مالیې وزارت مالي مرستیال ښاغلي عبدالحبیب ځدراڼ، د ښارجوړونې او ځمکو وزارت د ځمکو چارو مرستیال ښاغلي ګل الرحمن توتاخیل او د افغانستان لپاره د اسیا پراختیایې بانک رئیس ښاغلي نریندرا سینګرو تر منځ نن د کب میاشتې په ۱۴ مه نېټه په افغانستان کې د اسیا د پراختیایي بانک د تمویلونکو پروژو لپاره د حفاظتي تدابیرو د اغیزمنتیا په موخه درې اړخیز هوکړه لیک لاسلیک شو.
د یاد هوکړه لیک له مخې د ښار جوړونې او ځمکو وزارت مکلف دی چې د ځمکو د استملاک قانون د ۴مې مادې سره سم دا قانون پلی او د ځمکو او نورو شتمنیو د مالکیت د تثبیت او بیو معلومولو، چې د پروژو د پلي کیدو په پایله کې اغیزمنې کیږي، د اړونده چارو مسئولیت واخلي.
د مالیې وزارت ژمن دی چې د اسیا پراختیایي بانک د تمویلونکو پروژو اړوند د ځمکو د استملاک او تصفیې چارو د ټولو لګښتونو پوره کولو لپاره اړینې مالي سرچینې برابرې کړي ترڅو د یادو پروژو تطبیق له خنډ او ځند سره مخ نه شي.
ټولو خواوو په دې هوکړه وکړه چې د مالیې، ښار جوړونې او ځمکو وزارتونو په ګډون د اړونده حکومتي ادارو د استازو په ګډون یوه ګډه کاري کمېټه رامنځته کړي چې دندې به یې په لاندې ډول وي:
۱. د اسیا پراختیایي بانک له لوري د تمویلونکو پروژو لپاره د ځمکو د استملاک او تصفیې اړونده فعالیتونو همغږي کول،
۲. د اسیا پراختیایي بانک د حفاظتي تدابیرو د اغیزمنتیا د غوښتنو پر بنسټ د ځمکو د استملاک او تصفیې اړونده فعالیتونو لپاره د معیاري کاري کړنلارو جوړول،
۳. د ځمکو د استملاک او تصفیې په برخه کې د یوې ملي پالیسۍ جوړول.
همداشان د یاد هوکړه لیک له مخې د ښار جوړولو او ځمکو وزارت مکلف شوی چې د اسیا پراختیایي بانک د تمویلونکو پروژو د ځمکو د استملاک او تصفیې اړونده فعالیتونو د پرمخ وړلو په موخه د وزارت په چوکاټ کې یوه بیله څانګه جوړه کړي. د مالیې وزارت ژمنه کوي چې د څانګې د لګښتونو د پوره کولو لپاره به مالي سرچینې چمتو کوي. د مالیې وزارت همدارنګه مکلف شوی چې د اسیا پراختیایي بانک د حفاظتي تدابیرو د شرایطو سره سم به د ځمکو د استملاک او تصفیې پلانونو د تطبیق په موخه د کابینې تایید ترلاسه کوي.
