مالیې وزارت د یو شمېر دولتي ادارو لپاره په سلګونو زره جلده ارزښت لرونکي سندونه چاپ کړي دي
د مالیې وزارت له لوري د ټولو بودیجوي واحدونو سره د نږدې همکاریو سربېره په (۱۴۰۲هـ.ل) مالي کال کي دغه وزارت د خپلي پراختیایي بودیجې په مټ د یو شمېر دولتي ادارو د اړتیا وړ په سلګونو زره جلده ارزښت لرونکي (بهادار) سندونه چاپ کړي دي.
د مالیې وزارت له لوري په (۱۴۰۲) مالي کال کي د خوندي اسنادو د چاپ دولتي مطبوعې لپاره د (۲۹۵۴۵۰۰۰۰) میلیونه افغانۍ او د صکوکو دولتي مطبوعې لپاره (۴۵۸۴۰۹۶۹۹) میلیونه افغانۍ په نظر کي نیول سوي وې، چي پرې په دغه کال کي د (۱۱) وزارتونو او دولتي ادارو لپاره د اړتیا وړ سلګونه زره جلده ارزښت لرونکي سندونه چاپ سوي دي.
په دغو ارزښت لرونکو سندونو کي؛ د سوداګرۍ جوازونه، د صادراتو او وارداتو ضمیموي فورمونه، د صادراتو او وارداتو فورمونه، طبي جوازونه، د ویزو سټېکرونه، د پاسپورټ د تمدید سټېکرونه، د بارنامو کتابچې، د معاملاتو لارښود، د چاپیریال ساتني جواز، د دولسم ټولګیو شهادتنامې، د پوهنتونونو ټرانسکریپټ او ډیپلومونه، د مسلکي زده کړو د ادارې ډیپلومونه او شهادتنامې، د رسنیو جواز، د ټي ۲ فورمې او د بررسي او قوانینو جوازونه شامل دي، چي د یادو مطبوعو له لوري په معیاري بڼه چاپ سوي دي.
