د ګمرکونو لوی ریاست تخنیکي پلاوي د ننګرهار محصولي او تورخم ګمرکونو ورځنۍ چاري و ارزولې!
د وږي ۳مه ۱۴۰۴هـ.ل
د مالیې وزارت د ګمرکونو لوی ریاست عملیاتي مرستیال مفتي ضیاءالرحمن فاروقي په مشرۍ تخنیکي پلاوي د ننګرهار محصولي او تورخم ګمرکونو، د روانو چارو تخنیکي څارنه او ارزونه وکړه؛ ترڅو شته ستونزي معلومي او د حل له پاره ئې اقدام وسي.
تللي پلاوي د ګمرکي طی مراحلو په برخه کي د ننګرهار محصولي او تورخم ګمرکونو د مسئولینو ستونزي او وړاندیزونه واورېدل او خپلي سپارښتني ئې هم له دوی سره شریکي کړې.
دغه شان نوموړي پلاوي، د مسئولو کارکوونکو ارزونه هم وکړه او دوی ته ئې په اړونده برخه کي عملي او نظري روزنه ورکړه.
د یادوني وړ ده، چي د ګمرکونو لوی ریاست تردې وړاندي هم بېلابېلو ګمرکونو ته د ګمرکي چارو د څارني او ارزوني په تکل تخنیکي پلاوي استولي او دا لړۍ به په راتلونکي کي هم دوام ولري.
