د ګمرکونو او عوایدو لویو ریاستونو تر منځ د همغږۍ لومړنۍ ناسته وسوه!
د مالیې وزارت د رهبرۍ له هدایت سره سم د ګمرکونو او عوایدو لویو ریاستونو تر منځ د همغږۍ لومړنۍ ناسته د ګمرکونو لوی رئیس الحاج مفتي عبدالمتین سعید او د عوایدو لوی رئیس حافظ مولوي شاه حسین حسیني په ګډه مشرۍ، چي د دواړو ریاستونو مرستیالانو او یو شمېر رئیسانو هم ګډون پکښي کړی وو، د عوایدو او ګمرکونو معینیت د غونډو په تالار کي ترسره سوه.
په پیل کي د ګمرکونو لوی رئیس ګډونوالو ته ښه راغلاست ووایه او د دواړو ریاستونو تر منځ ئې په اړوندو چارو کي پر لازمي همغږۍ ټینګار وکړ. ښاغلي سعید وویل، چي د دواړو ریاستونو تر منځ همغږي د خدمتونو په وړاندي کولو او د اغېزمنو پلانونو په ترتیب او پلي کولو کي مهم رول لري.
همدا شان په دې ناسته کي په هیواد کي د سوداګرۍ د ودي او د مالیاتو د راټولېدو په موخه د سوداګرو ستونزو ته پر خپل وخت د رسېدو او دوی ته د اسانتیاوو په رامنځته کولو، د داسي طرحو په جوړولو، چي د دواړو ریاستونو عواید اغېزمن نه کړي، د دواړو ریاستونو له لوري د خامو موادو د راوړونکو فابریکو د چارو پر څارنه او کنټرول، په اصولي ډول د سوداګریزو شرکتونو د پخوانیو باقیاتو په راټولېدو او یو شمېر نورو اړوندو موضوعاتو په تړاو بحث، خبري او په اړه ئې لازمي پرېکړي وسوې.
همدا رنګه په دې ناسته کي پرېکړه وسوه، چي په میاشتني ډول دي د ګمرکونو او عوایدو لویو ریاستونو او په ولایتونو کي دي د ګمرکونو او مستوفیتونو تر منځ د همغږۍ دا ډول ناستي ترسره سي.
