د کیفیت کنټرول مسلکي کولو له روزنیز پروګرام څخه فارغ سویو ته تصدیق پاڼي ورکړل سوې!
د لړم۱- ۱۴۰۴ هـ.ل
د مالیې وزارت د کارکوونکو چارو ریاست د بندرونو د کیفیت کنټرول ریاست کارکوونکو، چي د کیفیت کنټرول مسلکي کولو له پروګرام څخه فارغ سوي ول د یو لړ مراسمو په ترڅ کي تصدیق پاڼي ووېشلې.
په دې مراسمو کي د کیفیت کنټرول رئیس قاري محمد ابراهیم خلیل، د روزني او ظرفیت لوړولو آمر مفتي عبدالوهاب عابد د دعوت او ارشاد ریاست استازي مولوي حیات الله ابو احمد او یو شمېر مسئولینو ګډون کړی وو.
د روزني او ظرفیت لوړولو آمر ګډونوالو ته د خپلي وینا په ترڅ کي وویل، چي تاسو په ولایتونو کي د مالیې وزارت استازي یاست. هڅه وکړئ هغه پوهه او مهارتونه، چي مو ترلاسه کړي خلکو ته د غوره خدمتونو په وړاندي کولو سره او د بې کیفیته توکو په مخنیوي کي ورڅخه ګټه واخلئ، ځکه بې کیفیته نفتي مواد چاپېریال زیانمنوي او هم د خلکو روغتیا ته زیان اړوي.
د کیفیت کنټرول رئیس په خپله وینا کي وویل، تاسو د دې هیواد د شتنمۍ په توګه، د نفتي موادو او محصولاتو د کیفیت په ډاډمن کولو کي مهم رول لوبوئ. د محصولاتو او نفتی مواد له کیفیت څخه اطمینان تر لاسه کړئ او اجازه مه ورکوئ، چي د ټیټ کیفیت لرونکي نفتي توکو له واردولو سره د خلکو روغتیا او چاپېریال ته زیان واوړي، ځکه دا له انصافه لیري ده.
په پاي کي له روزنیز پرګرام څخه فارغ سویو ته تصدیق پاڼي ووېشل سوې او مراسم د خیر په دعا سره پای ته ورسېدل.
