د کابل ګمرک، په ګمرکي طی مراحلو کي اسانتیاوي رامنځته سوي دي
د ګمرکونو لوی ریاست د رهبرۍ د هدایت له مخي د کابل ګمرک په ګمرکي طی مراحلو کي د پخوا په پرتله ډيري اسانتیاوي رامنځته سوي دي.
مخکي تر دې به سوداګریزو شرکتونو کابل ګمرک ته د خپلو محمولو د داخلېدو لپاره د ګمرک ریاست ته عریضه کوله، چي طی مراحلو ئې زیات وخت ته اړتیا درلوده؛ خو اوس مهال د ګمرکونو لوی ریاست د رهبرۍ د هدایت له مخي سوداګرو ته د اسانتیا رامنځته کولو په موخه د عریضې دغه پروسه له منځه یووړل سوه.
د دې ترڅنګ دا چي د هیواد تازه مېوې او سبزي هم په کابل ګمرک کي طی مراحلېږي، د یادو توکو له خرابوالي څخه د مخنیوي او مارکیټونو ته په خپل وخت د رسېدو لپاره د کابل ګمرک کاري موده تر (شپږ نیمو بجو) اوږده سوې او د یادو توکو د چټک طی مراحلو لپاره د بررسۍ او مرستندوی مېز برخي، دوه دوه یوزرونه هم زیات سوي دي.
د یادوني وړ ده، چي د ګمرکونو لوی ریاست په دې هڅه کي دئ، چي د هیواد په ټولو ګمرکونو کي د سوداګرو لپاره لازمي اسانتیاوي برابري کړي او په دې برخه کي د دوی ټولي اصولي غوښتني ومني.
