د ولايتي عوايدو د همغږۍ او پراختيا رئيس ننگرهار ولايت ته سفر وکړ
د ماليې وزارت د عوايدو لوی رياست د ولايتي عوايدو د همغږۍ او پراختيا رئيس حافظ شاه حسين حسيني، ننگرهار ولايت ته د عوايدي پلان د تحصيل په موخه سفر وکړ.
نوموړي د ننګرهار ولایت د مستوفیت له مسؤلینو او کار کوونکو سره د لیدني ترڅنګ د ننگرهار مستوفي مولوي محمد فاروق انصاري پشه يي د مستوفيت د اداري چارو د کړنو او عوايدو راپور هم واورېده. ښاغلي انصاري پشه یي په خپلو خبرو کي وويل، چي موږ د کارونو د ښه والي او چټکوالي په موخه په ټولو برخو کي جدي کار کوو، تر څو ټاکل سوي اهداف پر خپل وخت تر لاسه کړو.
ښاغلي حافظ شاه حسين حسيني، د ټولو کارکوونکو له کړنو د منني ترڅنګ وویل، چي د عوايدو را ټولول د نظام د مستحکمولو لپاره يوه اړينه ملي پروسه ده چي د ماليې وزارت کارکوونکي يې پر مخ وړي، په همدې اساس د ننگرهار مستوفيت د مالياتي او غيرمالياتي عوايدو د تحصيل لړۍ چي د مالي کال آخره ربعه ده، بايد چټکه کړي، تر څو ننگرهار مستوفيت ته ورکړل سوی پلان بشپړ سي. نوموړي د دغه مستوفیت کارکوونکو ته راتلونکي کي د چارو د لا ښه والي په موخه اړيني لارښووني وکړې.
په پام کي ده، چي د ولايتي عوايدو د همغږۍ او پراختيا رئيس د ولايتي مالياتي ادارو (مستوفيتونو) د چارو د څارني او ارزوني په موخه نورو ولايتونو ته هم سفرونه وکړي.
