د وزارتونو او امارتي ادارو ترمنځ د همغږۍ ناسته وسوه!
د مالیې وزارت د عوایدو لوی رئیس مولوي حافظ شاه حسین حسیني په مشرۍ د وزارتونو او امارتي ادارو ترمنځ د همغږۍ ګډه ناسته وسوه.
د ناستي په پيل کي د عوایدو لوی رئیس د عوایدو پر اهمیت او د ملي بودیجې پر تمویل خبري وکړې؛ هغه وویل، "څومره، چي زموږ عواید زیات سي، په هماغه کچه به هیواد پرمختګ وکړي او هیوادوالو ته به غوره خدمات وړاندي سي."
د غونډي په جریان کي د عوایدو د پلان، تحقیق او نظارت ریاست استازي د روان مالي کال له حمل میاشتي څخه د جدي میاشتي تر پایه د وزارتونو او امارتي ادارو د عوایدي وضعیت راپور وړاندي کړ. همدارنګه، د ملي بودیجې ریاست استازي له لوري په همدې موده کي د وزارتونو او امارتي ادارو د پراختیایي پروژو د بودیجې او مصرف په تړاو بشپړ معلومات وړاندي سول.
ورپسې د وزارتونو او امارتي ادارو له استازو سره د هغوی د عوایدي وضعیت، فرصتونو او ستونزو په اړه بحث وسو او پر دې ټینګار وسو، چي د پراختیايي پروژو پلي کول د هیواد د پرمختګ له پاره اړین ګام دئ.
په پای کي د لوی اقتصاد، خزاینو، زېربنا او ملي بودیجې ریاستونو له خوا د وزارتونو او امارتي ادارو استازو ته د بودیجې د پلان جوړوني او لګولو په اړه لازمي سپارښتني هم وسوې.
