د هوټلونو له استازو سره مشورتي ناسته وسوه
په هیواد کي د هوټلونو او رسټورانټونو د فعالیتونو لپاره د اسانتیاوو رامنځته کولو په موخه د مالیې وزارت د عوایدو لوی ریاست د مسؤلینو او هوټلونو د استازو ترمنځ ګډه مشورتي ناسته وسوه.
په همدې تړاو جوړه سوې غونډه کي د عوایدو لوی ریاست عملیاتي مرستیال معراج محمد معراج، د مالیه ورکونکو رئیس عبدالقیوم نصیر او د عوایدو لوی ریاست د حقوقي خدمتونو رئیس ندا محمد صدیقي او د هوټلونو استازو ګډون کړی وو.
د عوایدو لوی ریاست د مالیه ورکونکو رئیس عبدالقیوم نصیرګډونوالو ته د ښه راغلاست ترڅنګ وویل: د مالیې وزارت مسؤلیت دا دئ، ترڅو د هیواد د ټولو پانګوالو ستونزي واوري او هغوی ته په اړوند برخو کي لازمي اسانتیاوي رامنځته کړي. ښاغلي نصیر د پانګوالو مسؤلیتونو ته په اشارې زیاته کړه، چي اوسمهال په هیواد کي امنیت ټینګ سوی او په ټولو برخو کي د کاروبار او پانګوني ښه فرصتونه برابر سوي دي، نو پانګوال هم باید ولس ته ښه خدمتونه وړاندي کړي او تر څنګ ئې مالیات پر وخت د هیواد بیت المال ته وسپاري.
ورپسې د هوټلونو استازو خپلې ستونزي شریکي کړې، د ستونزو له اورېدو وروسته د عوایدو لوی ریاست عملیاتي مرستیال معراج محمد معراج خبري وکړي او ډاډ ئې څرګند کړ، چي یادو سوو ټولو ستونزو ته به رسېدنه کېږي. ښاغلي معراج وویل، چي مالیې وزات د پانګوالو لپاره لازمي اسانتیاوي برابري کړي، چي له جملې ئې پر اصنافو د مالیې نورم له(۱،۵) سلني څخه (۰،۵) سلني ته ټیټول یوه بېلګه ده، نوموړي همدا راز غوښتنه وکړه، چي پانګوال باید د مالیاتي کتمان څخه ډډه وکړي او خپله مالیه په خپل وخت د دولت خزانې ته تحویل کړي.
په پای کي د هوټلونو له استازو غوښتنه وسوه، چي د خپلو ټولو مالیاتي ستونزو اړوند یوه معقوله طرحه جوړه او د مالیې وزارت سره ئې شریکه کړي، تر څو ستونزو ته په سمه توګه رسېدنه وسي.
